अनेकजणांना कॉम्प्युटरपेक्षा लॅपटॉप वापरणं अधिक सोयीचं वाटतं. लॅपटॉपला जास्त जागाही लागत नाही आणि तो कुठेही कधीही वापरता येतो. म्हणूनच या स्मार्ट उपकरणाचा वापर अनेकांना सोयीचा वाटतो. पण, अनेकदा त्याची काळजी कशी घ्यायची हेच आपल्याला माहिती नसते, म्हणून लॅपटॉपला अधिक नुकसान पोहोचतं, तेव्हा या स्मार्ट उपकरणाची काळजी कशी घ्यायची याबद्दल थोडक्यात जाणून घेऊ.
– लॅपटॉप वर्षांतून एकदा व्यावसायिक जाणकाराकडून साफ करून घ्यावा, सर्व्हिसिंग करताना त्याच्या आतील बाजूला साठलेला धूळ, कचरा निघून जातो.
– जर तुम्ही घरच्या घरी लॅपटॉप साफ करत असाल तर लॅपटॉप बंद करून त्याला जोडलेली बाहेरील अटॅचमेंट काढून मगच तो साफ करायला घ्यावा.
– लॅपटॉप साफ करताना थेट क्लीनिंग सोल्यूशनचा वापर करू नका. एका पातळ सुती कपडय़ावर किंवा स्पंजवर सोल्यूशनचे थेंब घेऊन हलक्या हाताने लॅपटॉप साफ करावा.
– लॅपटॉप साफ करण्यासाठी तेलकट किंवा ओशट कपडय़ाचा वापर करू नये. कारण कपडय़ातील तेलकटपणा लॅपटॉपला लागून त्यावर धूळ बसली तर धुळीचा चिकटपणा तयार होऊन त्यावर अधिकाधिक धूळ साचून जाड थर तयार होतो
– की बोर्ड आणि कडेच्या बाजूंच्या सफाईसाठी ब्रशचा किंवा मलमलच्या कापडाचा वापर करावा.
– लॅपटॉपवर काम करण्यापूर्वी आपले हात स्वच्छ धुवून घ्यावेत. कारण हाताला असलेला चिकटपणा किंवा तेलकटपणा लॅपटॉपला लागून त्याचा पृष्ठभाग किंवा स्क्रिन खराब होतो.
