आयआरसीटीसी आपल्याला केवळ रेल्वेचे बुकींग करण्यासाठी माहित आहे. कधी प्रवाशांना मोफत पाणी देऊन तर कधी चहाची किंमत कमी करुन या सरकारी यंत्रणेकडून प्रवाशांना खूश केले जाते. देशभरात पसरलेले रेल्वेचे जाळे सांभाळणारी ही यंत्रणा नागरिकांचा प्रवास सुरळीत व्हावा यासाठी प्रयत्नशील असल्याचे दिसते. नुकतीच IRCTC कडून एक विशेष घोषणा करण्यात आली असून त्यामार्फत ग्राहकांना स्वस्तात मस्त भटकंती करता येणार आहे. अंदमान बेटावर फिरण्यासाठी ५ दिवस आणि ४ रात्रींचे पॅकेज IRCTC कडून देण्यात येणार आहे. यामध्ये अंदमानमधील पोर्ट ब्लेअर आयलँड, पोर्टब्लेअर नॉर्थ बे आयलँड, रॉस आयलँड आणि हॅवलॉक आय़लँड ही ठिकाणे दाखविण्यात येणार आहेत. ही टूर ३० मे २०१९ पर्यंत दररोज आयोजित केली जाणार असून तुम्ही कोणत्याही दिवसासाठी बुकींग करु शकता.
यामध्ये पोर्ट ब्लेअर येथे ३ रात्री, हॅवलॉक येथे एक रात्र तसेच याठिकाणी अंतर्गत फिरण्यासाठी गाडीची सुविधा, सर्व ठिकाणची प्रवेश फी तसेच सकाळची न्याहारी दिली जाणार आहे. तसेच रेल्वे किंवा विमानाचे तिकीट यांचा समावेश असेल. IRCTC ने यासाठी खास पॅकेज केली असून त्याअंतर्गत स्टँडर्ड आणि कम्फर्ट असे दोन पर्याय देण्यात आलेले आहेत. तसेच ग्राहकांना कोणत्या हॉटेलमध्ये राहायचे याचीही माहिती यामध्ये देण्यात आली आहे. जर बुकींग केल्यानंतर तुम्हाला टूर रद्द करावी लागली तर किती दिवसांसाठी किती पैसे कापले जाणार याची माहितीही IRCTC ने दिलेली आहे. ज्यांना या ऑफरचा लाभ घ्यायचा आहे त्यांच्यासाठी IRCTC च्या वेबसाईटवर विस्ताराने माहिती देण्यात आली आहे. याठिकाणी कोणती ठिकाणे फिरवण्यात येणार आहेत यांची यादीही देण्यात आली आहे.
