गोव्याच्या भूमीत..

गोव्यात वन्य प्राण्यांची तीन अभयारण्ये आहेत. गोव्याच्या उत्तर-पूर्व सीमेवरील मोलेमजवळ असलेले भगवान महावीर अभयारण्य हे त्यातील सर्वात मोठे आहे. मांडवी नदीलगत डॉ. सलीम अली पक्षी अभयारण्यही हळूहळू पर्यटकांचे आकर्षण ठरू पाहत आहे. शिवाय करमळी रेल्वे स्थानकापासून दोन-तीन किलोमीटरवर ‘बर्ड वॉचिंग साइट्स’ आहेत. तिथे आतापर्यंत पक्ष्यांच्या सुमारे ५०० प्रजाती पाहावयास मिळाल्या आहेत. त्यातील पक्ष्यांच्या सुमारे ३० टक्के प्रजाती विदेशातील आहेत. हे पक्षी थंडीच्या मोसमात तेथे येतात आणि उन्हाळा सुरू होताच स्थलांतर करतात. त्यामुळे हे पक्षी पाहण्यासाठी पक्षीप्रेमींनी तेथे ऑक्टोबर ते मार्च यादरम्यान भेट द्यायला हवी.
गोव्यातील खाद्यसंस्कृतीत मसाल्याला मोठे महत्त्व आहे. फोंडा आणि परिसरात सुमारे डझनभर ‘स्पाइस प्लान्टेशन फार्म’ आहेत. तिथे हार घालून आणि टिळा लावून पारंपरिक पद्धतीने तुमचे स्वागत केले जाते. स्वागतपेय म्हणून तुम्हाला ‘हर्बल टी’ दिला जातो. त्यानंतर तेथील प्रशिक्षित गाइड तुम्हाला शिवारफेरी घडवितो. आपल्याला मसाल्याच्या बऱ्याच पदार्थाची तोंडओळख माहीत असते. मात्र, या पदार्थाच्या औषधी गुणधर्माबाबत गाइडकडून माहिती मिळाल्यानंतर आपली बोटे तोंडात जातात. शिवारफेरीनंतर केळीच्या पानावर घरगुती जेवणाचा आनंद घेता येतो. जेवणाआधी गोव्याची प्रसिद्ध काजुफेणीही दिली जाते.
पणजीत मांडवी नदीतील ‘पॅराडाइज क्रूझ’ ही बोट सफरही उत्तम आहे. या बोट सफरीत गोव्याची तीन लोकनृत्ये सादर केली जातात. प्रत्येक लोकनृत्यानंतर उपस्थितांना मंचावर बोलावून नाचण्याची संधी दिली जाते. आधी मुले, त्यानंतर जोडपी आणि नंतर पुरुषांना मंचावर नाचण्याचा आनंद घेता येतो. गोव्यात ‘पिणं’ स्वस्त आणि खाणं महाग आहे. शिवाय बहुतांश हॉटेलमध्ये जेवणाच्या वेळा काटेकोरपणे पाळल्या जातात. म्हणजे बहुतांश मोठय़ा हॉटेलांत दुपारी तीननंतर लंचची आणि रात्री ११ नंतर डिनरची ऑर्डर घेतली जात नाही. मात्र, वेळेचे नियोजन जमले तर गोव्याच्या खाद्यसंस्कृतीची मजा घेता येईल. हॉट एअर बलूनिंगबरोबरच हेलिकॉप्टर राइडची सुविधा गोवा पर्यटन महामंडळाने नुकतीच सुरू केली आहे. त्याचाही आनंद घेता येईल.

सुनील कांबळी sunil.kambli@expressindia.com