जव्हार शहरातील राममंदिर शेजारील इमारतीत राहणाऱ्या एका २२ वर्षीय तरुणाने फेसबुक लाईव्ह सुरू ठेवून आत्महत्या केल्याची धक्कादायक घटना गुरुवारी घडली. गुरूवारी संध्याकाळी पाचच्या सुमारास ही घटना घडल्याची माहिती समोर आली आहे. वाडा तालुक्यातील वीरा येथील नवनाथ बोगे हा २२ वर्षीय तरुण जव्हार येथील एका हॉटेलमध्ये वेटरचे काम करत होता. तो हॉटेल मालकाच्या फ्लॅटमध्ये रहायचा. परंतु अचानक त्यानं गुरूवारी संध्याकाळी पंख्यावर गळफास घेत आत्महत्या केली. यावेळी त्यानं आपल्या आत्महत्येचं फेसबुक लाईव्ह केलं. त्यामुळे ही घटना कॅमेऱ्याद कैद झाली आणि सर्वांना या घटनेची माहिती मिळाली. त्यानं आत्महत्या का केली याचे कारण अद्याप समजू शकलेले नाही. दरम्यान, जव्हार पोलीस ठाण्यात या घटनेची नोंद करण्यात आली आहे. या घटनेचा अधिक तपास जव्हार पोलीस करत आहेत.
