हिगोलीतील पोस्ट ऑफिस कार्यालय परिसरात एका महिलेने दीड वर्षांच्या मुलासह विहिरीत उडी मारुन आत्महत्या केल्याची घटना घडली. महिलेने आत्महत्या का केली, हे अद्याप स्पष्ट झालेले नाही. टपाल विभागाच्या कार्यालय परिसरात एक विहीर असून या विहिरीत मंगळवारी संध्याकाळी सविता पार्डीकर (वय २५) या महिलेचा मृतदेह तरंगताना आढळला. सतर्क नागरिकांनी याची माहिती पोलिसांना दिली. पोलिसांनी तातडीने घटनास्थळी धाव घेत महिलेचा मृतदेह विहिरीतून बाहेर काढला. महिलेसोबत तिचा दीड वर्षांचा मुलगाही होता, अशी माहिती नातेवाईकांनी पोलिसांना दिली. यानंतर पोलिसांनी विहिरीत मुलाचा शोध घ्यायला सुरूवात केली. रात्री उशिरा पोलिसांना विहिरीत दीड वर्षांच्या मुलाचा मृतदेह सापडला. महिलेने आत्महत्या का केली, हे अद्याप अस्पष्ट आहे. अंत्यसंस्कारानंतर महिलेच्या नातेवाईकांचा जबाब घेण्यात येईल, त्यांनी तक्रार दिल्यास गुन्हा दाखल केला जाईल, असे पोलिसांनी सांगितले.
