कुंभमेळ्याहून नागपूरला परतणाऱ्या बसला अपघात झाल्याने चार जणांचा मृत्यू झाला आहे. तर बसमधील अन्य ४६ जण जखमी झाले आहेत. कुंभमेळ्याहून जबलपूरमार्गे येणाऱ्या बसला पहाटे साडेतीन वाजण्याच्या सुमारास अपघात झाल्याने ही दुर्दैवी घटना घडली. बस ओढ्यामध्ये पडल्याने हा अपघात झाला असा प्राथमिक अंदाज आहे. बसमधील प्रवासी कुंभमेळ्याला गेले होते, ते प्रयागराजहून नागपूरला येत होते. या अपघातामागचे नेमके कारण अद्याप समजू शकले नसून चालकाचा तोल सुटल्याची शक्यता वर्तविण्यात येत आहे. पोलीस पुढील तपास करत असून तपासाअंती नेमके कारण स्पष्ट होईल. मध्य प्रदेशमधील जबलपूरजवळील करोंदा नाल्यात ही बस अचानक उलटली आणि अपघात झाला. अपघाताची माहिती मिळताच याठिकाणी पोलीस दाखल झाले. तसेच रुग्णवाहीका मागवण्यात आल्या. यानंतर जखमींना जवळच्या रुग्णालयात दाखल करण्यात आले. मात्र त्यामध्ये ४ जणांचा मृत्यू झाल्याचे स्पष्ट झाले आहे. बसमधील भाविकांची ओळख पटवण्याचे काम सुरु असून त्यांच्यावर तातडीने उपचार सुरु करण्यात आले आहेत. ही बस करोंदा नाल्याच्या पुलावरून खाली पडल्याने तिला क्रेनच्या साह्याने बाहेर काढण्यात आले. अपघात झाला तेव्हा पहाटेची वेळ असल्याने सर्व प्रवासी झोपेत होते. यामध्ये अनेकांच्या डोक्याला मार लागून गंभीर दुखापत झाली आहे.
