जवखेडे येथील दलित कुटुंबाच्या तिहेरी हत्याकांड प्रकरणी पाथर्डीमधील न्यायालयाने संशयित आरोपी प्रशांत जाधव याला गुरुवारी दहा दिवसांची पोलीस कोठडी सुनावली. प्रशांत जाधव याला त्याच्या घरातून बुधवारी रात्री उशीरा अटक करण्यात आली होती. याप्रकरणी पोलिसांनी बुधवारी प्रशांत जाधव याच्या घरातून काही शस्त्रे व कपडे जप्त केले. सुरुवातीला याबाबतीत कमालीची गोपनीयता बाळगण्यात आली. ही शस्त्रे व कपडे तपासणीसाठी तातडीने नाशिकला न्यायवैद्यक प्रयोगशाळेत पाठवण्यात आली आहेत. पोलीसांनी या घरातून दोन कुऱ्हाडी, एक करवत, एक जांबीया व ५ ते ६ जणांचे रक्ताळलेले कपडे जप्त केले. प्रशांत हा मयत संजय जाधव यांचा पुतण्या आहे. पाथर्डी तालुक्यातील जवखेडे (खालसा) गावी २० ऑक्टोबर रोजी संजय जाधव, त्यांची पत्नी जयश्री आणि त्यांचा १९ वर्षांचा मुलगा सुनील जाधव यांची खांडोळी करून क्रूर हत्या करण्यात आली होती. गेल्या दीड महिन्यांपासून पोलीस याप्रकरणाचा तपास करीत आहेत.