News Flash

आचारसंहितेआधीच ‘पेड न्यूज पर्व’!

निवडणूक आयोगाचा ससेमिरा टाळण्यासाठी आचारसंहितेच्या आधीच राज्यातील बहुतांश वृत्तपत्रांनी ‘पेडन्यूज’चा धमाका सुरू केला असून या वृत्तपत्रांचे कर्तेधर्ते आकर्षक ‘पॅकेज’ घेऊन संभाव्य उमेदवारांचे उंबरठे झिजवत आहेत.

| August 27, 2014 03:10 am

निवडणूक आयोगाचा ससेमिरा टाळण्यासाठी आचारसंहितेच्या आधीच राज्यातील बहुतांश वृत्तपत्रांनी ‘पेडन्यूज’चा धमाका सुरू केला असून या वृत्तपत्रांचे कर्तेधर्ते आकर्षक ‘पॅकेज’ घेऊन संभाव्य उमेदवारांचे उंबरठे झिजवत आहेत. या पॅकेजच्या नादात एका हिंदी वृत्तपत्राने आपल्या वाचकांना चक्क मतदार म्हणून उमेदवारांसमोर सादर केले आहे.
 गेल्या विधानसभा निवडणुकीत ‘अशोकपर्व’च्या निमित्ताने ‘पेडन्यूज’ प्रकरणाने कळस गाठला होता. त्याची गंभीर दखल घेऊन निवडणूक आयोगाने लोकसभा निवडणुकीत पेडन्यूजवर नजर ठेवण्यासाठी विशेष समिती नेमली होती. या समितीने राज्यातील काही वृत्तपत्रांना, तसेच अनेक उमेदवारांनाही दोषी ठरवले. यातून होणारी बदनामी टाळण्यासाठी आता राज्यातील प्रमुख वृत्तपत्रांनी (लोकसत्ता नाही) विधानसभा निवडणुकीच्या पाश्र्वभूमीवर शक्कल लढविली आहे.
आचारसंहिता लागण्यापूर्वीच या वृत्तपत्रांनी ‘पेडन्यूज’चा प्रकार सुरू केला आहे. काही वृत्तपत्रांनी बातमीच्या स्वरूपात संभाव्य उमेदवारांच्या कार्याचा आढावा घेणारी पानेच्या पाने प्रसिद्ध करणे सुरू केले आहे. प्रत्येक मतदारसंघासाठी दीड ते अडीच लाखाचा दर या विशेष पानांसाठी निश्चित करण्यात आला आहे. एका प्रमुख वृत्तपत्राने संभाव्य उमेदवारांशी संबंधित बातम्यांवर पूर्णपणे बंदी घातली आहे. कॉलम सेंटिमीटरच्या हिशेबाने पैसे मोजल्यावरच बातमी प्रकाशित केली जाईल, असे आदेश सर्व संबंधितांना देण्यात आले आहेत. आचारसंहिता लागण्यास काहीच दिवस शिल्लक असल्याने सध्या सर्वत्र राजकीय कार्यक्रम, उद्घाटन, भूमिपूजनांची रेलचेल आहे. या बातम्या पैसे मोजल्यावरच प्रकाशित केल्या जात आहेत. त्यामुळे अनेक आमदार व उमेदवार वैतागले आहेत.

सलग पाच वर्षे या वृत्तपत्रांना जाहिरातीही द्या व आता पुन्हा पैसे मोजा, हा प्रकारच चीड आणणारा आहे.
एका आमदाराने नाव प्रकाशित न करण्याच्या अटीवर व्यक्त केलेले मत.

पाच ते २५ लाखांचे पॅकेज
* एका बडय़ा वृत्तपत्राने तर आताच निवडणूकपूर्व व प्रचारकाळाचे ‘पॅकेज’ घेणे सुरू केले आहे. पाच ते २५ लाख, असा या पॅकेजचा दर आहे.
* एका जुन्या हिंदी वृत्तपत्राने तर आकर्षक पत्रके तयार करून प्रत्येक मतदारसंघात एकूण मतदार किती, त्यातले त्यांचे वाचक असलेले मतदार, त्यावरून काढण्यात आलेली वाचकसंख्या व त्याचे एकूण मतदारांच्या तुलनेतीलप्रमाण, याची आकडेवारीच तयार केली आहे. ही आकडेवारी संभाव्य उमेदवारांना सांगून पॅकेज मिळवले जात आहे.
* ही आकडेवारी सादर करण्याच्या नादात या वृत्तपत्राने आपल्या वाचकांना चक्क मतदार करून टाकले आहे. वाचकांच्या नकळत हा प्रकार सुरू आहे.
* सध्या निवडणुकीची घोषणाच झाली नसल्याने प्रशासनाचे उमेदवारांच्या हालचालींकडे लक्ष नाही, तसेच वृत्तपत्रांवरसुद्धा बारीक नजर नाही. त्याचा फायदा घेत ‘पेडन्यूज’ चा प्रकार सर्रास सुरू झाला आहे.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on August 27, 2014 3:10 am

Web Title: paid news feast hits major newspapers
टॅग : Code Of Conduct
Next Stories
1 दुष्काळी मराठवाडय़ासाठी केंद्राकडे पॅकेज मागणार
2 पंकजा मुंडेंची संघर्षयात्रा उद्यापासून
3 परभणीत कुठे पेरणीच नाही, कुठे दुबार पेरणीवरही पाणी!