सुगम संगीताच्या ज्येष्ठ गायिका, 'हेल्पर्स ऑफ हॅन्डीकॅप्ड' या संस्थेच्या उपाध्यक्षा आणि सामाजिक कार्यकर्त्या रजनी करकरे- देशपांडे यांचे शनिवारी रात्री सव्वा अकराच्या सुमारास निधन झाले. ते ७४ वर्षांच्या होत्या. रजनी यांच्या निधनाने सुगम संगीत आणि दिव्यांगांच्या विश्वात मोठी पोकळी निर्माण झाली. रजनी यांना श्वास घेण्यास त्रास होत असल्यामुळे त्यांना ३ ऑगस्टपासून कोल्हापूर येथील एका खासगी रुग्णालयात दाखल करण्यात आले होते. त्यांच्यावर सुरू असताना त्यांना फिट्सही यायच्या. अखेर फुफ्फुसाच्या विकाराने रात्री सव्वा अकराच्या सुमारास त्यांची प्राणज्योत मालवली. त्यांच्या पश्चात पती पी.डी. देशपांडे आहेत. आज पंचगंगा स्मशानभूमीत त्यांच्यावर अंत्यसंस्कार करण्यात आले. रजनीताई यांना वयाच्या पाचव्या वर्षी पोलिओ झाला होता. पराकोटीच्या अपंगत्वावर मात करत त्यांनी संगीत क्षेत्रात नाव कमावले. तीस वर्षांहून अधिक काळ त्यांनी आकाशवाणीच्या वेगवेगळ्या केंद्रांवरुन गायनाचे कार्यक्रम सादर केले. वरात, हे दान कुंकवाचे, दैवत आदी सिनेमांसाठी त्यांनी पार्श्वगायन केले असून ‘आनंदाचे डोही’ या त्यांच्या कार्यक्रमाचे एक हजारहून अधिक प्रयोग झालेत. १९८४ मध्ये नसिमा हुरजुक यांच्यासोबत त्यांनी 'हेल्पर्स ऑफ दी हॅन्डीकॅप्ड' या संस्थेची स्थापना केली. गेली ३० वर्षे त्या संस्थेच्या उपाध्यक्षा म्हणून काम पाहत होत्या. तसेच सुगम संगीताचे योग्य मार्गदर्शन मिळावे म्हणून त्यांनी कलांजली या संस्थेची स्थापना केली. गायक अभिजित कोसंबी, प्रसन्नजित कोसंबी, शर्वरी जाधव हे त्यांचे शिष्य आहेत.