‘मोरूची मावशी’ या नाटकातील ‘मावशी’ अजरामर करणारे, रंगभूमीसोबतच चित्रपट आणि टीव्ही मालिकांमधून रसिकांना खळखळून हसवणारे ज्येष्ठ अभिनेते विजय चव्हाण यांचे शुक्रवारी पहाटे दीर्घ आजाराने निधन झाले. ४० वर्ष चित्रपटसृष्टीमध्ये आपला ठसा उमटविणाऱ्या विजय मामांनी आजवर अनेक नाटकांमधून प्रेक्षकांचं मनोरंजन केलं. त्यातील काही नाटकं तर तुफान गाजली. चित्रपटामध्ये दर्जेदार काम करणाऱ्या मामाचं अभिनयावर अतोनात प्रेम. त्यांच्या याच प्रेमापोटी ते प्रत्येक भूमिका जगत आले. आतापर्यंत त्यांनी जवळपास ३५० ते ४०० चित्रपटांमध्ये भूमिका साकारली. विशेष म्हणजे त्यांची मोरुची मावशी, श्रीमंत दामोदर पंत ही त्यांची नाटके प्रचंड गाजली. विजू मामांनी अनेक नाटकांमधून प्रेक्षकांच मनोरंजन केल्याचं पाहायला मिळालं. 'मोरूची मावशी', 'श्रीमंत दामोदरपंत', 'तू तू मी मी', 'अशी ही फसवा फसवी', 'नवरा म्हणू नये आपला', 'ती तिचा दादला आणि मधला' ही नाटके त्याकाळी प्रपंड गाजली, विशेष म्हणजे आजही या नाटकांमुळे प्रेक्षक खळखळून हसताना दिसून येतात. दरम्यान, नाटकांप्रमाणेच त्यांनी अनेक चित्रपटामध्येही आपल्या अभिनयाची चुणूक दाखविली त्यामुळेच त्यांना अनेक पुरस्कारांनी सन्मानितही करण्यात आलं होतं. २०१७ चा 'संस्कृती कलादर्पण'च्या जीवनगौरव पुरस्कार आणि व्ही. शांताराम जीवन गौरव पुरस्काराने त्यांना सन्मानित करण्यात आलं होतं.