‘इंडिया बुल्स’च्या रेल्वे मार्गासाठी यंत्रणेची दडपशाही सुरूच

मोजणीस आक्षेप घेणाऱ्या शेतकऱ्यांना दमदाटी.. महिलांना धक्काबुक्की.. विरोधकांना पोलिसी वाहनात डांबून त्यांची सिन्नर ठाण्यात रवानगी.. आई-वडिलांना पोलीस ठाण्यात नेण्यास विरोध करणाऱ्या बालकांनाही धक्काबुक्की.. सायंकाळपर्यंत कोणताही गुन्हा दाखल न करीत शेतकरी व महिलांची केलेली अडवणूक..  प्रसारमाध्यमांच्या प्रतिनिधींना छायाचित्रणास केलेला मज्जाव..
मंगळवारी हे असे चित्र होते सिन्नर तालुक्यातील नायगावचे. इंडिया बुल्स वीज प्रकल्पाच्या रेल्वेमार्गासाठी नायगाव परिसरात जमीन मोजणी करताना महसूल यंत्रणेने पोलिसी बळाचा वापर करत पुन्हा तोच कित्ता गिरविल्याची तक्रार स्थानिकांनी केली आहे. दुसरीकडे या कामात जुंपलेल्या शासकीय अधिकाऱ्यांनी असा कोणताही प्रकार घडला नसल्याचे सांगून मोजणीची प्रक्रिया जिल्हाधिकाऱ्यांच्या निर्देशावरून होत असल्याचे स्पष्ट केले.
मोजणी प्रक्रियेत महसूल व पोलीस यंत्रणा इंडिया बुल्स कंपनीच्या दावणीला बांधली गेल्याचे चित्र आधीच पाहावयास मिळाले आहे. इंडिया बुल्सच्या रेल्वे मार्गासाठी शेतजमीन देण्यास होणारा विरोध मोडून काढत महसूल यंत्रणेने प्रचंड पोलीस फौजफाटय़ात मोजणीचे काम हाती घेतले. स्थानिकांचा विरोध असताना पोलिसी बळाचा वापर करून चाललेली ही प्रक्रिया बेकायदेशीर असल्याचा आक्षेप माजी न्यायमूर्ती बी. जी. कोळसे पाटील आणि शेतकरी संघर्ष समितीने नोंदविला आहे. यामुळे ही मोजणी त्वरित थांबवावी, अशी मागणी होत असताना महसूल यंत्रणा व पोलिसांनी त्याकडे दुर्लक्ष करत मंगळवारी सकाळी  नायगाव परिसरात या प्रक्रियेला वेग दिला. या वेळी मोजणीस विरोध करणाऱ्या शेतकरी व महिलांना धक्काबुक्की करून वाहनात डांबण्यात आले. त्यात मंगला पानसरे, भाऊसाहेब सांगळे यांना दुखापत झाल्याचे शेतकऱ्यांनी सांगितले. आई-वडिलांना पोलीस घेऊन जात असल्याचे पाहून लहान मुलांनी वाहन अडविण्याचा प्रयत्न केला. पोलिसांच्या फटकाऱ्यातून त्यांचीदेखील सुटका झालेली नाही. त्यांना धक्काबुक्की करत पोलिसांनी बाजूला हटविले. १३ महिलांसह एकूण २३ जणांना सिन्नर पोलीस ठाण्यात नेऊन बसविण्यात आले. त्यात महिला, नऊ वर्षांच्या चिमुरडय़ांसह काही लहान बालकांचाही समावेश असल्याचे शेतकऱ्यांनी सांगितले. या वेळी छायाचित्रण करण्यास वृत्तवाहिनीच्या प्रतिनिधीला पोलिसांनी अटकाव केला.
यासंदर्भात निफाडच्या प्रांताधिकारी संध्या नरके यांच्याशी संपर्क साधला असता त्यांनी असे काहीच घडले नसल्याचा दावा केला. नायगाव परिसरातील आठ गटांच्या मोजणीचे काम करावयाचे होते. शासकीय कामकाजात अडथळा आणणाऱ्यांना पोलिसांनी जागेवरून केवळ हटविले. मोजणीची ही संपूर्ण प्रक्रिया जिल्हाधिकाऱ्यांच्या लेखी आदेशानुसार होत आहे. त्यामुळे कोणी महसूल अधिकारी इंडिया बुल्ससाठी हे काम करत नसून शासनाने दिलेल्या निर्देशांचे पालन करीत असल्याचे त्यांनी स्पष्ट  केले. विरोध करणाऱ्या शेतकऱ्यांना ताब्यात घेतल्यावर पोलीस ठाण्यात का नोंद केली जात नाही, याबद्दल त्यांनी संबंधितांना स्थानबद्ध करून सायंकाळी सोडले जात असल्याची माहिती दिली.