आंबोली घाटमार्गाला राष्ट्रीय महामार्गाचा दर्जा

आंबोली रस्त्याला राष्ट्रीय महामार्ग क्रमांक ६६ देण्यात आला आहे. भारत सरकारने या रस्त्याबाबत निविदाही प्रसिद्ध केली आहे. १ एप्रिल ते २५ एप्रिल या कालावधीत निविदा प्रक्रिया होणार आहे. त्यामुळे राष्ट्रीय महामार्गाच्या हालचालींना वेग आला आहे. सावंतवाडी ते आंबोलीर्प्यत रस्त्यासाठीची जमीन संपादित करताना अनेकांची घरेही जाणार आहेत. हे काम लवकरच पूर्ण होणार आहे. भारत सरकारच्या मिनिस्ट्री ऑफ रोड अ‍ॅण्ड हायवेज, नवी दिल्ली राष्ट्रीय महामार्ग विभाग, कोल्हापूर, बांधकाम विभाग महाराष्ट्र यांचे प्रपोजलचे टेंडर (निविदा) प्रसिद्ध झाली आहे. राष्ट्रीय महामार्ग क्रमांक-६६ सावंतवाडी आजरा गडहिंग्लज हा राष्ट्रीय महामार्ग पुणे-बंगळुरूला जोडण्यात येणार आहे. पीडब्ल्यूडी पॅकेज-१ हा ७० किलोमीटरचा रस्ता वेंगुर्ला-मठ-आंबोली चंदगड बेळगाव रस्ता पीडब्ल्यूडी-२ पॅकेज हा ११० किलोमीटरचा रस्ता करण्यात येणार आहे. हा रस्ता लवकरच होण्यासाठी निविदा काढल्या आहेत. त्यामुळे आंबोली राष्ट्रीय महामार्ग-६६ वर शिक्कामोर्तब झाले आहे. महामार्ग झाल्यास याचा फटका या मार्गात रस्त्यालगत असणाऱ्या घरांना बसणार आहे. दाणोली बाजारपेठ तसेच आंबोली बाजारपेठ येथील घरांना व दुकानांना फटका बसणार आहे. ११० वर्षांपूर्वीची घरे असतील तरच मोबदला मिळू शकतो. याच्या अधिकृत नोंदी असणे आवश्यक आहेत. आंबोलीत कबुलायतदार गावकर जमिनीचा प्रश्न असल्याने नुकसानभरपाई मिळणे अवघड आहे. आंबोली घाटाचा प्रश्न मात्र यामुळे सुटला आहे. दरडींमुळे वाहतुकीचा प्रश्न गंभीर बनला होता. मात्र आता राष्ट्रीय मार्गामुळे केंद्र स्तरावरून लवकरच घाटातील उपाययोजना होणार आहेत. शिवाय घाटातील जमिनीला पर्यायी जागा अन्यत्र देण्यात येणार आहे. केंद्र स्तरावर निर्णय आहे. ७० किलोमीटर आणि ११० किलोमीटरचे दोन रस्ते राष्ट्रीय महामार्गाने जोडल्याने कर्नाटक, महाराष्ट्र आणि गोवा अशा तिन्ही राज्यांना जोडणारा घाट म्हणून आंबोली घाटालाही महत्त्व आले आहे. राष्ट्रीय महामार्ग झाल्याने आंबोली घाटाला पर्यायी रस्त्याचा वापर तितकासा होणार नाही. हा रस्ता तिन्ही राज्यांना जोडणारा असल्यामुळे टोल नाके कुठे व किती बसतील याचा संभ्रम आहे. महाराष्ट्र राज्याचा व कर्नाटक राज्याचा असे तीन टोलनाके होतील असा अंदाज आहे. त्यामुळे वाहतूकदारांना याचा फटका बसू शकतो. ग्रामपंचायतीचा पर्यटन कर वसुलीचा राज्य सरकारचा आदेश आहे व यातून पर्यटन विकास साधण्यात येणार आहे. मात्र राष्ट्रीय महामार्गावर असा टोल बसवणे शक्य नाही.