खोपोली येथे पुरातन गणेशमूर्ती सापडली

खोपोली शहरातील शांतीनगर परिसरात राहाणाऱ्या एका शेतकऱ्याच्या शेतातील भूगर्भात रविवारी, २६ मे रोजी रात्री ८.४५ वाजण्याच्या सुमारास एक काळ्या पाषाणाची अंदाजे सव्वा फुट उंचीची पुरातन गणेश मूर्ती सापडली. त्यामुळे या भागात आनंदोत्सव साजरा करण्यात आला. या मूर्तीची अंगारकी चतुर्थीच्या मुहूर्तावर विधिवत स्थापना करण्यात आली.
शांतीनगर येथील रहिवासी पांडुरंग हरिभाऊ मालकर आणि चंदन मालकर यांची याच परिसरात शेतजमीन आहे. या शेतजमिनीत खोदकाम सुरू असताना जमिनीच्या भूगर्भात काळ्या पाषाणाची सव्वा फूट उंचीची गणेशमूर्ती रविवारी रात्री ८.४५ वाजण्याच्या सुमारास आढळून आली. मरिआई भक्त नंदकुमार पाटील यांनी या मूर्तीला भूगर्भातून बाहेर काढीत सोमवारी विधिवत पूजाअर्चा आणि आरती करून या मूर्तीची स्थापना केली. या परिसरात सर्वत्र आनंदोत्सव साजरा करण्यात येत असून, स्वयंभू गणेशमूर्ती अंगारकी चतुर्थीच्या वेळेस सापडल्याने आश्चर्य व्यक्त करण्यात येत आहे. दरम्यान, नवसाला पावणाऱ्या महड येथील वरदविनायक गणपतीच्या दर्शनासाठी अंगारकी चतुर्थीनिमित्ताने भक्तांचा महापूर लोटला होता. सोमवारी रात्री १० वाजल्यापासून भक्तांनी दर्शनासाठी रांगा लावल्या होत्या. दिवसभरात हजारो भाविकांनी दर्शन घेतले. यावेळी मंडळाने धान्यापासून काढलेली रांगोळी भक्तांचे आकर्षण ठरत होती. विविध कार्यक्रमाचे यावेळी आयोजन करण्यात आले होते.