जळगावात महाजन, दानवेंसमक्ष खडसे समर्थकाला मारहाण

दानवे यांच्या उपस्थितीत भाजपच्या ग्रामीण जिल्हाध्यक्षाच्या निवडीसाठी शुक्रवारी सिंधी कॉलनीतील संत हरदासराम मंगल कार्यालयात बैठक आयोजित करण्यात आली होती.  निवडणूक प्रक्रिया सुरू होण्यापूर्वीच भुसावळ येथील कार्यकर्त्यांनी शहराध्यक्ष निवडीबाबत आपला आक्षेप नोंदविला. शहराध्यक्ष निवडीवरून संबंधित कार्यकर्त्यांनी पक्षाच्या नेत्यांना थेट जाब विचारला. पक्षाचे नेते त्यांची दखल घेत असताना काही कार्यकर्ते मंच सोडून खडसेसमर्थक तथा भुसावळ येथील नगरसेवक आणि जिल्हा सरचिटणीस सुनील नेवे यांच्या अंगावर धावून गेले. त्यांनी नेवे यांच्या अंगावर शाई फेकली. धावपळीमध्ये अनेकांच्या अंगावर शाई पडली. कोणीच कोणाचे ऐकण्याच्या मनस्थितीत नसल्याने रावसाहेब दानवे बैठक सोडून निघून गेले. या वेळी गिरीश महाजन यांनी सर्वाना शांत करून निवडणुकीचा कार्यक्रम पुढे सुरू ठेवला.

भाजपच्या भुसावळ शहराध्यक्ष निवडीसाठी एकूण ११ जण इच्छुक होते. इच्छुकांपैकी कोणाचीही शहराध्यक्षपदासाठी निवड न झाल्याने कार्यकर्त्यांनी संताप व्यक्त केला. त्यावरूनच ग्रामीण जिल्हाध्यक्ष निवडीत वादाची ठिणगी पडल्याचे बोलले जात आहे.