सांगली : सांगलीजवळ समडोळीमध्ये जनावराच्या गोठ्याजवळ आलेल्या मगरीला नागरिकांनी पकडून वन विभागाच्या हवाली केले. समडोळी गावा जवळ असलेल्या खाणीतून एक मगर शुक्रवारी रात्री साडेदहा वाजण्याच्या सुमारास जनावराच्या गोठ्या जवळ आली होती. सदरची घटना नागरिकांनी वन विभाग ला संपर्क करत कळवली. सदर मगर ही गावातील रेणुका मंदिर परिसराच्या मागील छप्परवजा गोठ्याच्या बाहेर बराच वेळ पडून होती. त्यामुळे नागरिकांनी तिला जेरबंद करत वन विभागाच्या ताब्यात दिली.
सदर घटनेची माहिती वन विभागास मिळताच उप वन संरक्षक नीता कट्टे , सहाय्यक वन संरक्षक अजित साजणे, यांच्या मार्गदर्शनात वन विभागाच्या कर्मचाऱ्यानी योग्य ती काळजी घेवून त्या मगरीला रात्रीच ताब्यात घेवून कुपवाड येथील कार्यालयात हलवले.
हेही वाचा…सांगलीत ५ जणांचे उमेदवार अर्ज अवैध
शनिवारी सकाळी मगरीची वैद्यकीय तपासणी पशू वैद्यकीय अधिकाऱ्यांकडून केल्या नंतर नैसर्गिक अधिवासात सोडण्याचा निर्णय घेण्यात आला. पूर्ण वाढ झालेल्या, ४ वर्षाच्या मादी मगरीला वरीष्ठ कार्यालयाची पूर्व परवानगी घेत निसर्गात मुक्त करण्यात आले.
समडोळी गावा जवळील जुन्या खाणीत एक मगर बरेच दिवस मुक्कामी होती. खाणीत भर टाकून ती भरून घेण्याचे तसेच कचरा साफ करण्याचे काम चालू होते त्याच कारणाने ही मगर नागरी वस्तीत आली असावी असा अंदाज आहे.
या मगरीच्या बचाव कामात समडोळी गावातील नागरिक तसेच उप सरपंच पिंटू मसाले, कोळी यांचे सहकार्य लाभले. वन विभागाचे वन क्षेत्रपाल सर्जेराव सोनवडेकर, वनपाल तुषार भोरे, वनरक्षक सागर थोरवत इतर वन कर्मचारी यांनी ही कारवाई पूर्ण केली.
