एखाद्याचा वाढदिवस साजरा करायचे म्हटले की मोठा गाजावाजा, बॅनर, हारतुरे आणि शुभेच्छांचा वर्षाव असे एकंदरीत चित्र असते. या सगळ्या प्रकाराला छेद देऊन उस्मानाबादमध्ये तुळजापूर तालुक्यातील केमवाडी येथील शेतकरी भाऊसाहेब काळे यांनी आगळ्यावेगळ्या पद्धतीने वाढदिवस साजरा करुन एक आदर्श निर्माण केला आहे. सध्याच्या करोना विषाणू संसर्गामुळे संपूर्ण जग संकटाच्या खाईत असताना आपला वाढदिवस या परिस्थितीला साजेसा आणि अविस्मरणीय ठरेल अशाच पद्धतीने साजरा करण्याचा त्यांनी निर्णय घेतला. करोनामुक्तीसाठी एक पाऊल म्हणून भाऊसाहेब काळे यांनी आपल्या वाढदिवसाच्या दिवशी स्वखर्चाने संपूर्ण गावात निर्जंतुकीकरण फवारणी केली. त्यांच्या या आगळ्यावेगळ्या उपक्रमाचे सर्वत्र कौतुक होत आहे.
