अवकाळी पावसाचा द्राक्ष, गहू, कांद्याला फटका

हिवाळ्याचा हंगाम निरोप घेण्याच्या मार्गावर असताना शनिवारी नाशिक जिल्ह्यास दिवसभर बोचरी थंडी आणि सायंकाळी अचानक अवकाळी पावसाचा सामना करावा लागला. हवामानाचा हा लहरीपणा द्राक्ष बागांसह हाताशी आलेल्या गहू, हरभरा व कांदा पिकांसाठी हानीकारक ठरणार असल्याने शेतकरी धास्तावला आहे.
सलग चार ते पाच दिवसांपासून गारव्याचे प्रमाण कमी असताना शनिवारी हवामानात अचानक बदल झाला. आदल्या दिवशीच्या तुलनेत या दिवशी तापमान तीन अंशांनी कमी होऊन ९.९ अंशावर आले. सकाळपासून नाशिकसह उत्तर महाराष्ट्रातील अनेक भागांत ढगाळ वातावरण होते. कमालीचा गारवा जाणवत असल्याने सर्वाना हुडहुडी भरली होती. सायंकाळी चारच्या सुमारास शहर व परिसरात रिमझिम पावसाला सुरूवात झाली. अचानक सुरू झालेल्या पावसाने लोकांची तारांबळ उडाली. थंडीपासून बचाव करण्यासाठी स्वेटर, कानटोपी परिधान करणाऱ्यांना सायंकाळी रेनकोट व छत्रीचा आधार घ्यावा लागला. जिल्ह्यातील दिंडोरी, लासलगावसह काही भागांत तुरळक सरींनी हजेरी लावली.
पावसाचे पाणी घडांमध्ये साठून मण्यांना तडे जावू शकतात तसेच बुरशीही लागू शकते असा अंदाज तालुका कृषी अधिकारी संदीप मेढे यांनी व्यक्त केला. द्राक्ष काढणीचा हंगाम सुरू असताना हे अस्मानी संकट कोसळल्याने हाता तोंडाशी आलेला घास हिरावला जाण्याची भीती व्यक्त होत आहे. अवकाळी पावसाचा फटका तयार झालेला गहू व हरभऱ्याबरोबर कांद्यालाही बसणार असल्याचे मेढे यांनी सांगितले.