मतपत्रिका ‘काका’, ‘भैया’ आणि ‘अॅड’

निवडणुकीच्या मतपत्रिकेवर आपले नाव विशिष्ट पद्धतीनेच छापले जावे, नावापुढे ‘अॅड.’,  ‘भैया’, ‘काका’, ‘दादा’ या उपाधी आवर्जून असाव्यात यासाठी उमेदवार आग्रही आहेत. त्यासाठी त्यांनी निवडणूक निर्णय अधिकाऱ्यांकडे अर्जही केले आहेत. त्यामुळे उमेदवारांचा हा आग्रह अधिकाऱ्यांनी मान्य केला आहे. त्यामुळे आता मतदानावेळी मतपत्रिकेवर उमेदवारांची नावे त्यांच्या आवडीच्या पद्धतीने छापली जाणार आहेत.
उमेदवारी अर्ज मागे घेण्याची आज दुपारी ३ पर्यंत अंतिम मुदत होती. त्यानंतर चिन्ह वाटप झाले. त्या वेळी नगर शहर मतदारसंघाचे निवडणूक अधिकारी वामन कदम यांनी उमेदवार व त्यांच्या प्रतिनिधींची बैठक घेतली. या बैठकीत त्यांनी आपल्याकडे उमेदवारांचे, आपले नाव विशिष्ट पद्धतीनेच मतपत्रिकेवर छापले जावे यासाठी काहींचे अर्ज आल्याची माहिती देतानाच, अर्ज मान्य करण्यात आल्याने उमेदवारांची नावे मागणीनुसार छापले जातील, असे जाहीर केले.
भाजपचे उमेदवार अभय आगरकर यांनी आपल्या नावापुढे ‘अॅड.’ लावावे असा अर्ज दिला. शिवसेनेचे अनिल राठोड यांनी आपल्या नावापुढे ‘भैया’ लावावे, राष्ट्रवादीचे संग्राम जगताप यांनी आपले नाव ‘संग्राम अरुणकाका जगताप’ असेच छापले जावे, असा अर्ज दिला आहे. निवडणुकीतील अपक्ष उमेदवार मकरंद कुलकर्णी व आनंद लहामगे या दोघांनीही ‘नारळ’ हे चिन्ह अर्ज करून मागितले होते. त्यामुळे चिठ्ठय़ा टाकून, त्यानुसार लहामगे यांना ते चिन्ह देण्यात आले. अपक्ष उमेदवार अनिल शेकटकर यांनी मागितलेल्या चिन्हापैकी एकही चिन्ह निवडणूक आयोगाने यंदा राखून ठेवले नव्हते. त्यामुळे  अखेर उपलब्ध चिन्हांतूनच ते निवडावे लागले. उमेदवार मकरंद कुलकर्णी बैठकीला अनुपस्थित होते. त्यामुळे निवडणूक अधिकाऱ्यांनीच त्यांना चिन्ह ठरवून दिले. ठरवून दिलेल्या चिन्हाला अपील करण्याची संधी नसल्याचेही त्यांनी स्पष्ट केले.