कृपा करा गर्दी कमी करा; सगळं बंद करण्याची वेळ आणू नका : मुख्यमंत्री

“करोनाचा व्हायरस हळूहळू वाढतोय. काळजीची गरज नाही परंतु नागरिकांनी सुचनांचं पालन केलंय. घाबरून जाऊन चालणार नाही. ज्याला हा आजार झालाय ती व्यक्ती अपराधी नाही. त्यांनी आपला परदेशवारीचा इतिहास लपूव नये. जर त्यांनी असं केलं तर ते चूक आहे. बाहेरून येणाऱ्यांसाठी क्वारंटाईनची सुविधा सुरू करत आहोत. ज्यांच्यात करोनाची लक्षण आढळली त्यांच्यासाठी आयसोलेशनचीही सुविधा सुरू करत आहोत,” असंही मुख्यमंत्र्यांनी स्पष्ट केलं. “राज्यातील चाचणी केंद्र सुरू करण्यावर आज पंतप्रधानांशी चर्चा झाली आहे. तसंच आरोग्यमंत्र्यांशीही चर्चा करण्यात आली आहे. त्यांनीही आवश्यक ती पावलं उचलण्याचं आश्वासन दिलंय. राज्यातील चाचणी केंद्र वाढवण्यासही ते मदतीसाठी तयार आहेत,” असंही त्यांनी स्पष्ट केलं.

मुख्यमंत्र्यांची भावनिक साद
“कोणीही घाबरून चालणार नाही. यंत्रणेवरचा भारही कमी करणं आपलं काम. यंत्रणेचं काम सुरू ठेवणं आपल्या हातात असतं. ती सुद्धा माणसं आहेत, कोणाचे कुटुंबीय आहेत हे आपण लक्षात ठेवलं पाहिजे. सरकारनं दिलेल्या सर्व सुचना नागरिकांनी पाळाल्या पाहिजे. संकटाला जात धर्म नसतो. एकजुटीनं आपण याविरोधात लढायला हवं. सर्वांच्या सहकार्याची गरज आहे, असंही त्यांनी स्पष्ट केलं.