आष्टीमध्ये भरदिवसा तरुणाच्या खुनाचा थरार

दोन इनोव्हा गाडीतून आलेल्या मारेकऱ्यांनी आष्टी तालुक्यातील दादेगावजवळील भिल्ल वस्तीवर गुन्हेगारी पाश्र्वभूमी असलेल्या संजय ऊर्फ बुट्टया शिवराम गायकवाड याच्यावर भरदिवसा गोळय़ा झाडल्या. रक्ताच्या थारोळय़ात कोसळताच धारदार शस्त्रांनी वार करून
त्याची निर्घृण हत्या केली. जिवाच्या आकांताने पळणाऱ्या संजयच्या खुनाचा थरार वस्तीने अनुभवला. शुक्रवारी सकाळी साडेनऊच्या सुमारास हे थरारनाटय़ घडले.
घटनास्थळी वरिष्ठ पोलीस अधिकारी दाखल झाले. खुनानंतर पसार झालेल्या आरोपींचा शोध सुरू करण्यात आला. आष्टी तालुक्यातील अंभोरा पोलीस ठाण्याअंतर्गत दादेगावजवळ ही भिल्लवस्ती आहे. वस्तीवर शुक्रवारी सकाळी साडेनऊ वाजता पांढऱ्या रंगाच्या इनोव्हा गाडीतून आलेल्या १० ते १२ मारेकऱ्यांनी संजय ऊर्फ बुट्टय़ाच्या हत्येचा थरार घडवला. सकाळी आपल्या घरासमोर बसलेला संजय गायकवाड (वय ३५) दोन गाडय़ा आल्यामुळे उठून उभा राहिला. गाडीतून खाली उतरताच आरोपींनी त्याच्या दिशेने गोळ्यांच्या तीन फैरी झाडल्या. दोन गोळ्या लागल्यानंतर जिवाच्या आकांताने संजय पळत राहिला. मात्र, हातात तलवारी घेतलेल्या आरोपींनी पाठलाग सुरू केला. थोडय़ा अंतरावर जाऊन संजय कोसळला. तोच त्याच्यावर तलवारीने सपासप वार करण्यात आले. हात-पाय हे अवयव वेगळे होतील, इतके वार केल्यानंतर आरोपी काही क्षणातच गाडीतून पसार झाले. २० ते २५ मिनिटे चाललेल्या या थराराने वस्तीसह गावातही मोठी दहशत पसरली.
माहिती मिळताच वरिष्ठ पोलीस अधिकारी घटनास्थळी दाखल झाले. पोलीस बंदोबस्त वाढवण्यात आला. संजय हा गुन्हेगारी पाश्र्वभूमीचा होता. त्याच्या नावावर अनेक पोलीस ठाण्यांत गुन्हय़ांची नोंद आहे. गुन्हेगारी टोळीतील अंतर्गत वादातूनच खुनाची घटना घडली असावी, असा कयास बांधून पोलिसांचा तपास सुरू आहे. हत्येचे कारण सायंकाळपर्यंत स्पष्ट झाले नव्हते. कोणालाही या प्रकरणात अटक झाली नाही. अंभोरा पोलीस ठाण्यात गुन्हा दाखल करण्यात आला. संजय गायकवाड याचा सकाळी खून झाल्यानंतर सर्वत्र नाकाबंदी करण्यात आली. त्याच्या शरीरात एक गोळी मिळाली. खुनाचा तपास वेगाने सुरू करण्यात आला असून, खून नेमका कुठल्या कारणाने व कोणी केला, याचा शोध पोलीस घेत असल्याचे पोलीस अधीक्षक नवीनचंद्र रेड्डी यांनी सांगितले.