आता शेतकऱ्यांचा हिसका बघाच; राष्ट्रवादीच्या उमेदवाराचं अजित पवारांना आव्हान

“सातत्यानं आम्ही शेतकरी चळवळीत सहभागी होत असतो. त्यामुळेच राष्ट्रवादी काँग्रेसने आम्हाला उमेदवारी दिली आहे. पण अजित पवार यांनी भाजप पुरस्कृत अपक्ष उमेदवाराला पाठिंबा जाहीर केला आहे. त्यांचं ते वक्तव्य हे विधान दुर्देवी आहे. त्याचा आमच्यावर कोणत्याही प्रकारचा परिणाम होणार नाही,” असं घाटणेकर यांनी स्पष्ट केलं.

“आम्ही शेतकरी चळवळीतली माणसं आहोत. अजित पवार यांनी आम्हाला पाठिंबा दिला किंवा नाही दिला त्याचा आम्हाला फरक पडणार नाही. शेतकऱ्यांना सोबत घेऊन करमाळा मतदारसंघात आम्ही ही लढाई लढू आणि जिंकून दाखवू,” असंही त्यांनी स्पष्ट केलं. दरम्यान, राष्ट्रवादी काँग्रेसच्यावतीने करमाळा विधानसभा मतदारसंघात संजय कृष्णराव पाटील (घाटणेकर) यांना उमेदवारी दिली होती. मात्र त्यानंतर त्यांना उमेदवारी अर्ज मागे घेण्याचा आदेश पक्षाच्यावतीने देण्यात आले मात्र तांत्रिक अडचणीमुळे अर्ज मागे घेता आला नाही. तो अर्ज तसाच आहे. त्यामुळे अपक्ष उमेदवार संजयमामा शिंदे यांना राष्ट्रवादी काँग्रेसच्यावतीने जाहीर पाठिंबा देण्याचे निश्चित करण्यात आले असल्याचे राष्ट्रवादी काँग्रेसकडून सांगण्यात आलं आहे.