नागपूर अमरावती मार्गावरील गोंडखैरीच्या बस स्थानकाजवळ एका ट्रक आणि बाईकची धडक होऊन भीषण अपघात झाला. ट्रक आणि बाईकची धडक होऊन बाईकचालक ट्रकच्या बोनेटमध्ये अडकले होता. तेवढ्यात मागून ट्रकला एका वेगवान कारनेही धडक दिली. या तिहेरी अपघातात काहीजण जखमी झाले. याच मार्गावरून मुख्यमंत्री एकनाथ शिंदे यांचा ताफा जात होता. त्यांना अपघाताची माहिती मिळताच त्यांनी ताफा थांबवून जखमींना मदत केली. गोंडखैरी बसस्थानकाजवळ अपघात झाल्यानंतर तिथे बघ्यांची गर्दी जमली होती. त्यामुळे मुख्यमंत्री एकनाथ शिंदे यांन ताफा थांबवण्याची सूचना केली. ते वाहनातून बाहेर पडले आणि त्यांनी ट्रकखाली अडकलेल्या तरुणाला बाहेर काढायला लावले. या अपघातात तरुण गंभीर जखमी झाला आहे. त्यामुळे त्याला वेळेत उपचार मिळावेत याकरता मुख्यमंत्री एकनाथ शिंदे यांनी त्यांच्या ताफ्यातील रुग्णवाहिका तरुणाला दिली. या जखमी तरुणाला नागपुरातील रवी नगर चौकातील सेनगुप्ता रुग्णालयात दाखल करण्यात आले. या व्यक्तीसह अन्य तिघांना मदत करून मुख्यमंत्र्यांनी त्यांना तत्काळ खाजगी रुग्णालयात दाखल करून त्यांच्यावर उपचार करण्याचे निर्देश संबंधित रुग्णालयातील डॉक्टरांना दिले. या तरुणाला तत्काळ अतिदक्षता विभागात दाखल करून त्याच्यावर उपचार सुरू झाले असून त्याची प्रकृती आता स्थिर आहे. तसंच, मुख्यमंत्री एकनाथ शिंदे स्वतः रुग्णालयात गेले होते. तिथे जाऊन त्यांनी जखमींची विचारपूस केली. ट्रकखाली अडकलेल्या तरुणाचे नाव गिरीश केशरावजी तिडके असे असून तो नागपूरच्या गोंड खैरीवाडी येथील रहिवासी आहे. त्याच्याशिवाय या अपघातात जखमी झालेले वंदना राकेश मेश्राम (सिद्धार्थ नगरवाडी, नागपूर), रंजना शिशुपाल रामटेके (राहणार रामबाग मेडिकल चौक नागपूर) आणि शुद्धधन बाळूजी काळपांडे (राहणार मौदा नागपूर) यांनाही रुग्णालयात दाखल करून त्यांच्यावर डॉक्टरांकडून उपचार सुरू झाले आहेत.