सांगली : मराठा समाजाला आरक्षण देण्यास आमचा विरोध नाही, मात्र, कुणबी दाखले देउन मराठा समाजाला कोणत्या वर्गातून आरक्षण शासन देणार हे स्पष्ट करावे, जर ओबीसी कोट्यातून आरक्षण देणार असाल तर आमचा विरोध राहील असे महाराष्ट्र ओबीसी व्हीजेएनटी बहुजन परिषदेचे सरचिटणीस संग्राम माने यांनी मंगळवारी विटा येथे सांगितले. आणखी वाचा-“ओबीसी समाजात संभ्रम निर्माण करू नये”, एकनाथ शिंदेंचा छगन भुजबळांना इशारा; म्हणाले, “मराठा समाजाला…” माने म्हणाले, सध्या राज्यात सरसकट मराठा समाजाला कुणगी प्रमाणपत्र देण्याच्या हालचाली सुरू आहेत. मराठा समाजातही आर्थिकदृष्ट्या मागासलेले लोक आहेत. अशांना शिक्षणात व नोकरीमध्ये आरक्षण मिळण्यास आमचा विरोधच नाही. मात्र, ओबीसी समाजाने पन्नास वर्षे संघर्ष करून आरक्षण मिळवले आहे. त्या कोट्यातूनच जर मराठा समाजाला आरक्षण देण्याचा प्रयत्न झाला तर हा ओबीसीवर अन्याय ठरेल. हे आमचा समाज मान्य करणार नाही. यासाठी पुन्हा संघर्ष करावा लागला तर यासाठी आमची तयारी आहे. ओबीसी नेत्यांनी पक्ष न पाहता समाजासाठी एकत्र येउन हा लढा लढण्याची गरज आहे असेही माने यांनी सांगितले.
