पुणे : पुणे महानगरपालिका आयुक्त नवल किशोर राम हे शासकीय बंगल्यात राहण्यास येण्यापूर्वी त्या बंगल्यातील मौल्यवान वस्तु गायब झाल्याची घटना घडली. त्या पार्श्वभूमीवर मनसेचे शहर अध्यक्ष साईनाथ बाबर हे पदाधिकारी, कार्यकर्त्यांसह जाब विचारण्यासाठी गेले होते.त्यावेळी महापालिका आयुक्त नवल किशोर राम यांच्याकडून मनसे कार्यकर्त्यांना अर्वाच् भाषा वापरल्याची घटना घडली. त्यामुळे मनसेचे कार्यकर्ते आक्रमक होते. महापालिका आयुक्त यांच्या दालनाबाहेर जवळपास तासभर ठिय्या आंदोलन करण्यात आले. त्यानंतर महापालिका आयुक्त नवल किशोर राम आणि मनसे पुणे शहर अध्यक्ष साईनाथ बाबर, किशोर शिंदे यांच्यासह कार्यकर्त्यांसमवेत बैठक झाली.
महापालिका आयुक्तांनी केलेल्या विधानाबाबत जाहीर माफी मागावी,अशी मागणी मनसे कार्यकर्त्यांनी बैठकीमध्ये केली. महापालिका आयुक्तांनी माफी मागण्यास नकार दिल्याने मनसे कार्यकर्ते आक्रमक झाले. त्यामुळे पोलिसांनी मनसे शहर अध्यक्ष साईनाथ बाबर,महेश भोईभार यांना पोलिसांनी बाहेर काढलं आणि शिवाजीनगर पोलिस स्टेशनमध्ये आणण्यात आले. त्या मनसेच्या कार्यकर्त्यांनी महापालिके बाहेर घोषणाबाजी देखील केली.
पुणे महानगरपालिका आयुक्त नवल किशोर राम यांनी महापालिका आयुक्त पदाचा पदभार स्वीकारून जवळपास दोन महिन्याचा कालावधी होत आला आहे.त्यापूर्वी डॉ.राजेंद्र भोसले हे महापालिका आयुक्त होते आणि ते चित्तरंजन वाटिका येथील बंगल्यात राहत होते.त्यांच्यानंतर नवल किशोर राम हे राहण्यास येणार असल्याने,महापालिका भवन,विद्युत, सुरक्षा विभागाच्या अधिकाऱ्यांनी घराची पाहणी केली. त्यावेळी घरातील चार एसी,झुंबर,ऐतिहासिक वास्तूंच्या चित्रांसह अन्य चित्रे,जुन्या काळातील पितळी कांस्य धातूचे दिवे, दोन मोठे एलईडी टीव्ही,कॉफी मेकर, वॉकीटॉकी सेट,रिमोट बेल्स, चिमणीसह सुसज्ज किचन टॉप, वॉटर प्युरिफायर असे साहित्य घरात नसल्याचे समोर आले. यामुळे एकच खळबळ उडाली.या वस्तु नेमक्या कुठे गेल्या,अशी चर्चा अधिकारी वर्गामध्ये सुरू झाली.
त्याच दरम्यान आवश्यक अशा काही वस्तूची प्रशासनामार्फत खरेदी तात्काळ करण्यात आली आहे.मात्र अन्य वस्तू खरेदी करण्यासाठी 20 लाख रुपयांची निविदा प्रक्रिया राबविण्यास सुरुवात केली आहे.पण मुद्दा हाच राहतो की,महापालिका आयुक्तांच्या बंगल्यातील वस्तू नेमक्या कुठे गेल्या अशी चर्चा सुरू झाली.
