रुग्णसेवेच्या ध्यासाला दातृत्वाची साथ हवी!

नांदेड : राज्यातील मोजक्या सेवाभावी रुग्णालयांच्या यादीत विराजमान झालेले किनवटचे साने गुरुजी रुग्णालय रौप्य महोत्सवाच्या उंबरठय़ावर आहे. मात्र आता रुग्णालयाचा विस्तार करून लाखो रुग्णांच्या सुविधेसाठी तातडीचे वैद्यकीय उपचार देणारे ‘मल्टिस्पेशालिटी हॉस्पिटल’ उभारण्याचा संकल्प विश्वस्तांनी केला आहे. त्यासाठी त्यांना आर्थिक बळ हवे आहे.

राज्याच्या अनेक दुर्गम भागांत आजही आरोग्य व्यवस्थेचा प्रश्न गंभीर आहे. किनवटसारख्या भागात २५ वर्षांपूर्वी आरोग्यप्रश्न अधिकच बिकट होता. त्या वेळी थोर समाजसेवक बाबा आमटे यांच्या प्रेरणेतून डॉ. अशोक बेलखोडे यांनी १९९५च्या सुमारास किनवटमध्ये साने गुरुजी रुग्णालयाची स्थापन केली. त्यामुळे रुग्णालयाने जवळपास ४०० गावांतील रुग्णांसाठी रोगनिदान आणि उपचारांसोबतच एका मोठय़ा आधार केंद्राचे स्थान प्राप्त केले.

या रुग्णालयात जेमतेम २५ खाटांची सोय व्यवस्थापनाला करता आली, पण रुग्ण तपासणी, उपचारांसोबतच अनेक आजारांवरील शस्त्रक्रिया आदी सुविधांमुळे किनवटपासून दीडशे ते तीनशे कि.मी. दूर असलेल्या शहरी भागातील रुग्णालयांत धाव घेऊन उपचार घेण्याचा रुग्णांवरील प्रसंग टळला.

रुग्णसेवेच्या झपाटलेपणातून उभारलेली ही संस्था केवळ उपचार व रुग्ण तपासणीचे केंद्र न राहता विज्ञान, प्रसार, आरोग्य, शिक्षण-प्रशिक्षण, संशोधन आदी बहुविध क्षेत्रांत अत्यंत प्रतिकूल स्थितीत कार्यरत आहे. अशाही स्थितीत डॉ.बेलखोडे आणि त्यांच्या सहकाऱ्यांनी नियोजित ‘मल्टिस्पेशालिटी’ रुग्णालयासाठी तब्बल दोन लाख चौरस फूट जागा मिळविली. किनवट शहरालगत असलेल्या एमआयडीसीत मुख्य रस्त्याला लागूनच असलेल्या या जागेत १०० खाटांचे सुसज्ज रुग्णालय उभारण्याचा संस्थेचा मनोदय असून, ते उभे राहिल्यावर उच्चशिक्षित, तज्ज्ञ डॉक्टर आणि प्रशिक्षित कर्मचारी उपचार व रुग्णसेवेसाठी उपलब्ध होतील, असेही नियोजन करण्यात आले आहे. हे रुग्णालय लवकर उभे राहावे, यासाठी समाजातील दानशूर व्यक्ती आणि संस्थांच्या मोठय़ा मदतीची संस्थेला अपेक्षा आहे.

प्रस्तावित ‘मल्टिस्पेशालिटी हॉस्पिटल’ दोन टप्प्यांमध्ये कार्यान्वित करण्याचे विश्वस्तांनी ठरविले आहे. पहिल्या टप्प्यातील ५० खाटांच्या रुग्णालय उभारणीचा खर्च पाच कोटी आहे. सध्याच्या साने गुरुजी रुग्णालयाने गेल्या २१ वर्षांत वर्षांला १० हजारप्रमाणे दोन लाखांहून अधिक रुग्णांवर निदान व उपचार केले. याच कालावधीत १० हजारांहून अधिक रुग्णांवर तातडीचे उपचार करून त्यांना जीवदान दिले. अपघातग्रस्त, हृदयाचा तीव्र झटका आलेले किंवा सर्पदंश झालेले रुग्ण, गुंतागुंत निर्माण झालेल्या गर्भवती स्त्रिया अशांसाठी आवश्यक ती सेवा व उपचार आजही किनवट व दीडशे कि.मी.च्या परिघात नाही. त्यामुळे या भागाची गरज लक्षात घेऊन साने गुरुजी रुग्णालयाचे एका सुसज्ज मल्टिस्पेशालिटी हॉस्पिटलमध्ये रूपांतर करण्याची योजना संस्थेने आखली आहे.

राष्ट्रीय युवा योजनेचे संचालक डॉ. एस. एन. सुब्बाराव यांनी साने गुरुजी रुग्णालयाच्या प्रस्तावित विस्ताराची संपूर्ण माहिती घेऊन आदिवासी व गरीब जनतेला माफक दरात चांगल्या दर्जाची वैद्यकीय सेवा देण्याच्या या प्रयत्नांना समाजाने पाठबळ द्यावे, अशी अपेक्षा व्यक्त केली आहे.