वाई : बंडखोर एकनाथ शिंदे आणि शिवसेना आमदारांना परत शिवसेनेत येण्याचे आवाहन करण्यासाठी सातारा जिल्ह्यातील बिजवडी (ता माण) येथील शिवसेना उपजिल्हाप्रमुख संजय भोसले हे थेट गुवाहाटीत पोहचले आहेत. ‘एकनाथ शिंदे ‘मातोश्री’ वर परत चला’ चा फलक हातात घेऊन हॉटेल रेदिसन ब्लू बाहेर उभे होते. पण, हॉटेल बाहेर कडक सुरक्षा व्यवस्था ठेवण्यात आली असल्याने गुवाहाटी पोलिसांनी संजय भोसले यांना ताब्यात घेतले आहे. ही कारवाई नियमानुसार केल्याचे म्हटले आहे. संजय भोसले यांनी एकनाथ शिंदेंना आर्त साद घालण्याचा प्रयत्न केला. त्यांनी आपल्या हातात “शिवनसेना जिंदाबाद! एकनाथ शिंदे (भाई) मातोश्रीवर परत चला, उद्धवजी आणि आदित्यजींना साथ द्या” असा मजकूर लिहलेला फलक घेतला होता. या माध्यमातून त्यांनी एकनाथ शिंदेंना शिवसेनेत परत येण्याचे भावनिक आवाहन केले.
