“महाराष्ट्राला लवकरच शिवसेनेचा मुख्यमंत्री मिळणार’, आदित्य ठाकरेंचं सूचक वक्तव्य

शिवसेनेच्या काही नेत्यांनी उघडपणे आदित्य ठाकरे यांनी मुख्यमंत्री व्हावं अशी इच्छा बोलून दाखवली आहे. पण आदित्य ठाकरे यांनी मात्र यावर बोलणं टाळलं होतं. पण प्रथमच आदित्य ठाकरे यांनी अप्रत्यक्षपणे मुख्यमंत्री होण्यात आपल्याला रस असल्याचं अप्रत्यक्षपणे बोलून दाखवलं आहे. इंडिया टुडेशी बोलताना आदित्य ठाकरेंनी म्हटलं की, “लवकरच शिवसेनेचा मुख्यमंत्री असेल. सध्या लोकांना माझ्याकडून जशी अपेक्षा आहे त्याप्रमाणे मी त्यांची सेवा करणार”.

आदित्य ठाकरे यांनी उमेदवारी जाहीर केली तेव्हा उद्धव ठाकरे पत्नी रश्मी ठाकरे तसंच मुलगा तेजस ठाकरेसोबत उपस्थित होते. आदित्य ठाकरेंनी अर्ज दाखल केल्यानंतर उद्धव ठाकरे यांनी प्रसारमाध्यमांशी संवाद साधला. यावेळी त्यांना मनसे अध्यक्ष राज ठाकरे यांनी आदित्य ठाकरेंविरोधात उमेदवार दिलेला नाही असं विचारलं असता त्यांनी सांगितलं की, “जे आदित्यला आशिर्वाद देत आहेत त्या सर्वांचा मी ऋणी आहे”.

पुढे बोलताना त्यांनी सांगितलं की, शिवसेनेची समाजसेवेची परंपरा पुढच्या पिढीत कायम राहत आहे. आम्ही निवडणूक न लढण्याचं ठरवलं होतं, पण हे नवीन पिढीचे विचार आहेत. तरुणांच्या विचाराने देश आणि राज्य पुढे जावं हीच इच्छा आहे”. २०१४ च्या विधानसभा निवडणुकीत शिवसेनेने ६३ जागा जिंकल्या होत्या, तर भाजपाने १२२ जागांवर विजय मिळवला होता. विशेष म्हणजे गेल्या निवडणुकीत दोन्ही पक्ष स्वतंत्रपणे लढले होते.