कुठेही चिखल करा कमळ फुलवा असं होऊ देणार नाही: आदित्य ठाकरे

“नोटबंदी आणि जीएसटी या निर्णयांमुळे अनेक उद्योग बुडाले. मात्र आमचं सरकार रोजगार निर्मितीसाठी पूर्ण प्रयत्न करणार आहे याचा मला पूर्ण विश्वास आहे. केजी टू पीजी शिक्षण बदलण्याची गरज आहे. त्यात नोकरीचीही हमी हवी, डिजिटल एज्युकेशन हे गाव पातळीवर न्यावं लागेल” असंही आदित्य ठाकरे यांनी म्हटलं आहे.

आजच हिवाळी अधिवेशना दरम्यान विरोधीपक्ष नेते देवेंद्र फडणवीस यांनी सामनाचे संदर्भ देऊन शिवसेनेवर टीकास्त्र सोडलं होतं. सामना मी आता वाचायला लागलो आहे. त्यामुळे त्याचाच संदर्भ देऊन या सरकारमध्ये कशी दुही आहे हे मी दाखवून देतो असंही फडणवीस म्हणाले होते. इतकंच नाही तर हे सरकार शेतकऱ्यांना मदत करण्याचं आश्वासन देत होतं मात्र सत्तेवर आल्यापासून मदत दिलेली नाही, यांच्या मंत्रिमंडळाचा विस्तारही झालेला नाही अशीही टीका फडणवीस यांनी केली.

दरम्यान शिवसेना आमदार आदित्य ठाकरे यांनी भाजपावर टीका केली. सत्तेची हाव कशी असते ते मी पाहिलं आणि मित्रांना कसं डावललं जातं ते मी अनुभवलं असं म्हणत तिखट शब्दात त्यांनी भाजपावर टीका केली. आता आदित्य ठाकरेंच्या टीकेला भाजपाकडून काही उत्तर दिलं जाणार का? हे पाहणं महत्त्वाचं ठरणार आहे.