“लोकशाही चिरडली जात आहे”, उर्दू लेखक ‘पद्मश्री’ पुरस्कार करणार परत

मुजतबा हुसैन यांनी सध्याची परिस्थिती पाहता आपण पुरस्कार परत करण्याचा निर्णय घेत असल्याचं सांगितलं आहे. सुधारित नागरिकत्व कायदा हा लोकशाहीवर हल्ला असल्याचं मत त्यांनी व्यक्त केलं आहे. मुजतबा हुसैन यांना २००७ मध्ये पद्मश्री पुरस्काराने सन्मानित करण्यात आलं होतं.

“देशात अशांतता, भितीचं वातावरण निर्माण केलं जात असून द्वेषाची आग भडकवली जात आहे. ही परिस्थिती चिंता वाढवणारी आहे. ज्या लोकशाहीसाठी आम्ही इतक्या यातना झेलल्या त्याच्यावर अशाप्रकारे हल्ला होणं निंदनीय आहे. अशा परिस्थितीत कोणताही सरकारी पुरस्कार मी ठेवू इच्छित नाही,” असं मुजतबा हुसैन यांनी सांगितलं आहे.

सुधारित नागरिकत्व कायदा आणि राष्ट्रीय नागरिक नोंदणीवर बोलताना मुजतबा हुसैन यांनी सांगितलं आहे की, “मी ८७ वर्षांचा आहे. या देशाच्या भविष्याची मला चिंता आहे. या देशाच्या आरोग्याची मला चिंता आहे, जे मी माझ्या मुलांसाठी आणि पुढील पिढीसाठी सोडत आहे”.