अभिनेता एजाज खान केंद्रीय अंमली पदार्थविरोधी पथकाने(एनसीबी) अटक केली आहे. ड्रग्ज प्रकरणी मंगळवारी विमानतळावरून एजाज खानला ताब्यात घेण्यात आलं होतं. यानंतर त्याच्यावर अटकेची कारवाई करण्यात आली. गेल्या आठवड्यात एनसीबीने शादाब शेख उर्फ शादाब बटाटा या अंमलीपदार्थ विक्रेत्याला अटक केली होती. चित्रपटसृष्टीशी संबंधित व्यक्तींना मागणीप्रमाणे विविध अंमलीपदार्थ उपलब्ध करून देण्यासाठी शादाब प्रसिद्ध होता. त्याच्या चौकशीतून अभिनेता एजाजचे नाव पुढे आले होते. मंगळवारी राजस्थानहून मुंबई विमानतळावर उतरताच एजाज याला एनसीबी पथकाने ताब्यात घेतलं. त्याच्याकडे एनसीबीच्या विभागीय कार्यालयात रात्री उशिरापर्यंत चौकशी सुरू होती. यानंतर त्याला अटक करण्यात आली. एनसीबीकडून एजाजशी संबंधित अंधेरीमधील लोखंडवाला येथील अनेक ठिकाणांवर धाडदेखील टाकण्यात आली. आठ तास चौकशी केल्यानंतर एजाज खानला अटक करण्यात आल्याचं एनसीबीच्या अधिकाऱ्यांनी सांगितलं आहे. फारुख बटाटा याचीदेखील याप्रकरणी आठ तास चौकशी करण्यात आली होती. पण चौकशीनंतर त्याला सोडण्यात आलं होतं. त्याचा मुलगा शादाब याला मात्र गेल्या आठवड्यात अटक करण्यात आली होती. अटक होण्याची ही पहिलीच वेळ नाही ड्रग्ज प्रकरणात अभिनेता एजाज खानचं नाव येण्याची ही पहिलीच वेळ नाही. २०१८ मध्ये बिग बॉसचा स्पर्धक राहिलेल्या एजाज खानना मुंबई पोलिसांनी अटक केली होती. मुंबईतील एका हॉटेलमधून त्याला अटक करण्यात आली होती. यावेळी त्याच्याकडे अमली पदार्थ सापडले होते. तर २०२० मध्ये फेसबुकवर आक्षेपार्ह पोस्ट टाकल्याप्रकरणी अटक करण्यात आली होती. फेसबुक लाईव्हदरम्यान केलेल्या कमेंटनंतर खार पोलिसांनी त्याला समन्स बजावलं होतं. यानंतर त्याच्यावर अटकेची कारवाई करण्यात आली होती.
