मनोरंजन विश्वात सध्या लग्नाचे वारे वाहत असून नुकतीच टेलिव्हिजनची लोकप्रिय जोडी दीपिका कक्कर आणि शोएब इब्राहिम विवाहबंधनात अडकले. त्यानंतर आता 'सुन रहा है ना तू', 'गलियाँ' यांसारख्या गाण्यांमध्ये प्रकाशझोतात आलेला गायक अंकित तिवारी विवाहबंधनात अडकला. व्यवसायाने इंजिनीअर असलेल्या पल्लवी शुक्लाशी कानपूरमध्ये अंकितने लग्नगाठ बांधली. त्याने स्वत: सोशल मीडियावर या लग्नसोहळ्याचे फोटो शेअर करत पत्नीसाठी सुरेख मेसेजदेखील लिहिला आहे. 'तूच माझी वर्तमान आणि माझं भविष्यही तूच आहेत,' असं कॅप्शन अंकितने या फोटोंना दिलं आहे. एका प्रवासादरम्यान अंकितच्या आजीची पल्लवीशी भेट झाली आणि त्यांनीच सुरुवातीला अंकितसाठी तिला पसंत केलं. पल्लवी अतिशय साधी मुलगी असून तिच्यातील साधेपणाच मला जास्त भावतो असं तो म्हणाला. मंगळवारी म्हणजेच २० फेब्रुवारी रोजी त्यांचा साखरपुडा झाला असून शुक्रवारी मोजक्या कुटुंबियांच्या उपस्थितीत हा लग्नसोहळा पार पडला. मुंबईत परतल्यावर मित्र-परिवार आणि बॉलिवूडमधील सहकाऱ्यांसाठी रिसेप्शनचं आयोजन करण्यात येणार आहे.
