अ‍ॅक्शनपट हा सध्या जगभरातील प्रेक्षकांच्या आवडीचा विषय आहे. या अ‍ॅक्शन चित्रपटांची सुरुवात खऱ्या अर्थाने ‘ब्रुस ली’ या अभिनेत्याने केली. अभिनेता म्हणून सुमार असणाऱ्या ब्रुस लीने आपल्या अजब ‘कुंग फू फाइट’ शैलीतून अगदी कमी कालावधीत प्रेक्षकांची मने जिंकली. पुढे याच ‘ब्रुस ली’च्या फाइट शैलीचे अनुकरण करत जॅकी चॅन, जेट ली, डोनी येन, नीना ली यांसारखे अनेक अभिनेते ‘अ‍ॅक्शन स्टार’ म्हणून नावारूपाला आले. या सुपरस्टारच्या आयुष्यावर प्रसिद्ध दिग्दर्शक शेखर कपूर ‘लिटिल ड्रॅगन’ नामक चित्रपटाची निर्मिती करतायेत. हॉलीवूड आणि बॉलीवूड दोन्हीकडे आपल्या दिग्दर्शन शैलीसाठी प्रसिद्ध असणाऱ्या शेखर कपूर यांनी तत्पूर्वी ‘मासूम’, ‘भुला ना देना’, ‘मिस्टर इंडिया’, ‘बॅन्डिट क्वीन’, ‘पानी’ यांसारखे सुपरहिट हिंदी चित्रपट आणि ‘एलिझाबेथ’, ‘न्यूयॉर्क आय लव यू’, ‘एलिझाबेथ द गोल्डन एज’, ‘पॅसेज’ या हॉलीवूड चित्रपटांचे दिग्दर्शन केले आहे; परंतु ब्रुस लीच्या आयुष्यावर चित्रपट तयार करणे हे त्यांच्यासाठी खरे आव्हान आहे.ब्रुस लीच्या आयुष्यावर तत्पूर्वी ‘द ग्रँड मास्टर’ आणि ‘आयपी मॅन’ हे दोन चित्रपट येऊन गेले आहेत; परंतु हे दोन्ही चित्रपट त्याच्या वैयक्तिक आयुष्यात अगदी वरवर डोकावून गेले आहेत. शेखर कपूर यांच्या मते हा सिनेमा वरील दोन्ही चित्रपटांपेक्षा पूर्णत: वेगळा असेल. ब्रुस लीच्या वैयक्तिक आयुष्यातील घडामोडींवर फार कमी संदर्भ उपलब्ध आहेत. ब्रूस ली हे पॉप स्टार मायकल जॅक्सनप्रमाणेच एक गूढ व्यक्तिमत्त्व होते. त्याचे फार कमी नातेवाईक होते. जेव्हा त्याचा मृत्यू झाला तेव्हा त्याची मुलगी शॅनन ली ही फक्त चार वर्षांची होती. त्यामुळे तिच्याकडून वडिलांविषयी मिळणारी माहिती फार वरवरची आहे. ब्रुस लीने ‘द किड’, ‘द बिग बॉस’, ‘फिस्ट ऑफ फ्यूरी’, ‘वे ऑफ द ड्रॅगन’ अशा ४१ चित्रपटांतून काम केले आहे. त्या दरम्यान चित्रपटाच्या दिग्दर्शकांनी आणि सहकलाकारांनी जो ब्रुस ली अनुभवला तसेच त्याच्याबरोबर मार्शल आर्ट शिकलेल्या फार मोजक्या लोकांच्या त्याच्याबद्दलच्या आठवणी.. हे सर्व संदर्भ एकत्र करून त्याचे व्यक्तिमत्त्व या चित्रपटात रेखाटण्यात येणार आहे. शू.. तो येत आहे ‘अल्फ्रेड हिचकॉक’ नामक दिग्दर्शकाने गूढकथा व भयकथा यांना दृश्य माध्यमांत आणण्याचा एक यशस्वी प्रयत्न केला. त्यानंतर केन्टीन टेरेन्टीनो, टॉमी विरकोला, गिआर्मो डेल टोरो यांसारख्या अनेक दिग्दर्शकांनी हिचकॉकच्या पावलांवर पाऊल ठेवत रहस्यमय, गूढ आणि थरारपटांची निर्मिती केली, परिणामी चित्रपटगृहात जाऊन भयपट पाहणारा एक वेगळा प्रेक्षकवर्ग निर्माण झाला. भयपटांच्या चाहत्यांसाठी आणखी एक आनंदाची पर्वणी म्हणजे बहुप्रतीक्षित रहस्यमय ‘इट’ हा चित्रपट लवकरच चित्रपटगृहातून झळकणार आहे. अ‍ॅनड्रेस मसचिट्टी दिग्दर्शित ‘इट’ या चित्रपटाच्या ट्रेलरने इंटरनेटवर अक्षरश: धुमाकूळ घातला आहे. २४ तासांत तब्बल १९७ दशलक्ष लोकांनी या सिनेमाचा ट्रेलर पाहिला. याआधी हा विक्रम ‘द फेट ऑफ द फ्यूरिअस’ या चित्रपटाच्या नावावर होता. नुकत्याच पार पडलेल्या ‘एम टीव्ही’ पुरस्कार सोहळ्यातही ‘इट’ चित्रपटाची जादू दिसली. या वेळी प्रेक्षकांसाठी चित्रपटातील काही भागांचे विशेष प्रक्षेपण केले गेले. त्यामुळे चित्रपटाबाबत प्रेक्षकांची उत्कंठा आता शिगेला पोहचली आहे. ‘इट’ या चित्रपटाचे दिग्दर्शन भयपट आणि विज्ञानपटांसाठी प्रसिद्ध असलेल्या अ‍ॅनड्रेस मसचिट्टीचे असल्याने लोकांमध्ये उत्सुकता जास्त आहे. १९८६ साली प्रकाशित झालेल्या ‘स्टीफन किंग इट’ या कादंबरीवर चित्रपटाची कथा आधारित आहे. १९९० साली याच कादंबरीवर आधारित ‘इट’ नावाची दूरदर्शन मालिका आली होती. हा चित्रपट या मालिकेचा रिमेक आहे. अ‍ॅनड्रेसच्या मते हा चित्रपट आजवर प्रदर्शित झालेल्या इतर सर्व भयपटांपेक्षा निराळा आहे. कथानक हे या चित्रपटाचे वैशिष्टय़ असून यातील अचाट कल्पनांमुळे प्रेक्षक हा सिनेमा कधीच विसरू शकणार नाहीत, असा विश्वास त्याने व्यक्त केला. ‘देसी गर्ल’ला ‘वंडर गर्ल’चे आव्हान आगळीवेगळी वेशभूषा, खळबळजनक ट्विट्स, इंटरनेटवर टाकले जाणारे सेल्फी, डाऊने जॉन्सन(द रॉक)बरोबरचा चित्रपट, ‘पीपल चॉईस अवॉर्ड’, ‘ऑस्कर’ पुरस्कार सोहळा यामुळे चर्चेत असलेली ‘देसी गर्ल’ प्रियांका चोप्रा आपल्या पहिल्या हॉलीवूडपटासाठी सज्ज आहे. बहुप्रतीक्षित ‘बेवॉच’ हा प्रियांकाचा मुख्य भूमिका असलेला पहिला हॉलीवूडपट २५ मेला प्रदíशत होत आहे. १९८९ साली ‘बेवॉच’ नावाची एक टीव्ही मालिका आली होती. हा चित्रपट याच मालिकेचा रिमेक अवतार आहे. ‘पॅरामाऊंट पिक्चर्स’च्या बॅनरखाली तयार झालेला हा चित्रपट २ जूनला भारतीय सिनेमागृहात प्रदíशत होणार आहे. मात्र प्रियांका चोप्राचे हॉलीवूड पदार्पण सहजरीत्या होईल असे वाटत नाही, कारण याच दिवशी हॉलीवूडच्या वंडर गर्लचा ‘वंडर वुमन’ हा चित्रपट प्रदर्शित होतो आहे. ‘बॅटमॅन वस्रेस सुपरमॅन : डॉन ऑफ जस्टिस’ या चित्रपटातून आपल्या अभिनयाची छाप सोडणारी अभिनेत्री गॅल गॅदॉत ही पॅटी जेकिंग्स दिग्दर्शित ‘वंडर वुमन’ या चित्रपटात मुख्य भूमिकेत दिसेल. हा चित्रपट ‘वंडर वुमन’ या कॉमिक व्यक्तिरेखेवर आधारित आहे. ‘बॅटमॅन’, ‘सुपरमॅन’, ‘स्पायडरमॅन’, ‘आयर्नमॅन’, ‘हिमॅन’, ‘कॅप्टन अमेरिका’, ‘थॉर’, ‘हल्क’ या माव्र्हलच्या सुपरहिरोंप्रमाणेच ही ‘वंडर वुमन’ पृथ्वीला वाचवणार आहे. जबरदस्त ग्राफिक्स, सिनेमॅटोग्राफी आणि अत्याधुनिक थ्रीडी अॅनिमेशन यांचा वापर करून तयार करण्यात आलेला हा चित्रपटही २ जूनला भारतात प्रदर्शित होतो आहे. ‘वंडर वुमन’च्या भूमिकेमुळे ‘वंडर गर्ल’ म्हणून प्रसिद्ध असलेल्या गॅलच्या चित्रपटाचे आव्हान नक्कीच प्रियांकासमोर असणार आहे.
