झी मराठी वाहिनीवर 'डान्सिंग क्वीन' या रिअॅलिटी शोचं नवीन पर्व प्रेक्षकांच्या भेटीला येणार आहे. यंदाच्या सिझनचा थीम हटके आहे. 'डान्सिंग क्वीन- साईज लार्ज फुल चार्ज' या नावावरूनच शोच्या थीमचा अंदाज आला असेल. या शोमध्ये १५ वर्षे व त्यावरील वयोगटाच्या मुली व महिलांनी सहभाग घेतला आहे. त्यांचं वजन ७० किंवा त्याहून अधिक असलं पाहिजे, हीच एक अट आहे. येत्या २४ सप्टेंबरपासून हा सिझन सुरू होणार आहे. नाट्यलेखक, दिग्दर्शक व अभिनेता म्हणून प्रसिद्ध असलेला अद्वैत दादरकर या कार्यक्रमाचं सूत्रसंचालन करणार आहे. तर या स्पर्धेत नृत्यदिग्दर्शन ओंकार शिंदे करणार आहे. मराठी चित्रपटसृष्टीची अप्सरा अर्थात सोनाली कुलकर्णी व आरजे मलिष्का या शोचे परीक्षक असतील. येत्या २४ सप्टेंबरपासून हा आगळावेगळा शो गुरुवात ते शनिवारी रात्री ९.३० वाजता झी मराठी वाहिनीवर प्रसारित होणार आहे.
