बॉलिवूड अभिनेता इरफान खान याच निधन होऊन आता बराच काळ लोटला आहे. मात्र, आजही त्याच्या आठवणींमध्ये चाहत्यांच्या डोळ्याच्या कडा पाणवतात. यात अनेकदा इरफानची पत्नी सुतापा त्याच्या आठवणींमध्ये काही फोटो किंवा पोस्ट शेअर करत असते. यावेळी नव्या वर्षाचं स्वागत करण्यापूर्वी सुतापाने इरफानसाठी अशीच एक भावूक करणारी पोस्ट शेअर केली आहे. यात तुझ्याशिवाय नव्या वर्षाचं स्वागत कसं करु असं तिने म्हटलं आहे. "२०२० या वर्षाला सर्वात वाईट म्हणणं तसं योग्य ठरणार नाही. कारण, या काळात सुद्धा तू माझ्यासोबत होतास. गेल्या वर्षी आजच्याच दिवशी झाडं लावतांना, चिमणीचं घरटं विणताना तू माझ्यासोबत होतास. कसं काय मी २०२० ला निरोप देऊ. इरफान मला नाही माहित मी २०२१ चं स्वागत कसं करेन",अशी पोस्ट सुतापाने शेअर केली आहे. दरम्यान, लोकार्नो फिल्म फेस्टिव्हल,२०१७ मध्ये प्रदर्शित झालेला इरफानचा चित्रपट द सॉन्ग ऑफ स्कॉर्पियन्स २०२१ मध्ये भारतीय चित्रपटगृहांमध्ये प्रदर्शित होण्यास सज्ज आहे. २९ एप्रिल २०२० मध्ये इरफान खानचं निधन झालं.
