अॅक्शन- थ्रिलर चित्रपट म्हटलं की बॉलिवूडमधील ठराविक कलाकार डोळ्यांसमोर येतात. यामध्ये अभिनेता जॉन अब्राहमचे नाव प्रामुख्याने समोर येते. बॉलिवूड मधला फिटनेस फ्रिक अभिनेता म्हणून जॉन अब्राहमकडे पाहिलं जातं. अनेक गाजलेले चित्रपट केल्यानंतर जॉन 'सत्यमेव जयते 2' या चित्रपटामध्ये झळकणार असून लवकरच या चित्रपटाच्या चित्रीकरणाला सुरुवात झाली आहे. काही दिवसांपूर्वी 'सत्यमेव जयते 2' या चित्रपटाचं पोस्टर प्रदर्शित झालं होतं. या पोस्टरमध्ये जॉन हल्कसारख्या लूकमध्ये दिसून आला होता. त्यामुळे या चित्रपटाविषयी प्रेक्षकांची उत्सुकता शिगेला पोहोचली होती. त्यानंतर आता या चित्रपटाच्या चित्रीकरणाला खऱ्या अर्थाने सुरुवात झाल्याचं सांगण्यात येत आहे. सध्या लखनऊमध्ये या चित्रीकरणाला सुरुवात झाली असून २१ मे २०२१ ला हा चित्रपट प्रेक्षकांच्या भेटीला येणार आहे. यापूर्वी जून महिन्यात या चित्रपटाच्या चित्रीकरणाला सुरुवात झाली होती. मात्र, लॉकडाउनमुळे हे चित्रीकरण अर्ध्यावर रखडलं होतं. मात्र, आता पुन्हा एकदा या चित्रीकरणाला सुरुवात झाली आहे. दरम्यान, या चित्रपटाचं दिग्दर्शन मिलाप झवेरी करत असून जॉनसोबतच अभिनेता मनोज बाजपेयीदेखील स्क्रीन शेअर करणार असल्याचं सांगण्यात येत आहे.
