अभिनेत्री प्रियांका चोप्रा आणि कंगना रणौत यांचा 'फॅशन' हा चित्रपट आजही अनेकांच्या स्मरणात असेल. फॅशन जगतावर प्रकाश टाकणारा हा चित्रपट त्याकाळी तुफान लोकप्रिय झाला. आज या चित्रपटाला १२ वर्ष पूर्ण झाली आहेत. त्यानिमित्ताने चित्रपटातील कलाकार त्यांच्या जुन्या आठवणींना उजाळा देताना दिसत आहेत. यात अभिनेत्री कंगना रणौतने मात्र, तिला सेटवर प्रियांकाकडून कशी वागणूक मिळाली हे तिने सांगितलं आहे. मधूर भांडारकर दिग्दर्शित 'फॅशन' या चित्रपटात प्रियांका चोप्रा मुख्य भूमिकेत झळकली होती. तर कंगना महत्त्वपूर्ण भूमिकेत पाहायला मिळाली होती. फॅशन जगतात मॉडेलिंग करणाऱ्या तरुणींच्या आयुष्यात कसे चढ-उतार येतात हे कंगना आणि प्रियांका या दोघींनी साकारलेल्या भूमिकेतून पाहायला मिळालं होतं. विशेष म्हणजे सेटवर प्रियांका मला मैत्रिणीप्रमाणे वागणूक देत होती, असं कंगनाने 'टाइम्स ऑफ इंडिया'च्या मुलाखतीत सांगितलं. "प्रियांका केवळ एक उत्तम अभिनेत्रीच नाही तर सहकलाकारदेखील आहे. फॅशन चित्रपट करत असताना मी केवळ १९ वर्षांची होते, तर प्रियांका त्यावेळीदेखील टॉपची अभिनेत्री होती. मात्र, तिने कधीच मला ज्युनिअर कलाकार किंवा लहान मुलगी म्हणून वागवलं नाही. तिने कायम मला एका मैत्रिणीप्रमाणे वागणूक दिली. माझ्यासोबत ती जेवायची, माझी विचारपूस करायची", असं कंगना म्हणाली. दरम्यान, फॅशन चित्रपटासाठी कंगनाला राष्ट्रीय पुरस्काराने सन्मानित करण्यात आलं असून या चित्रपटातील तिच्या अभिनयाचं आजही कौतूक करण्यात येतं. या चित्रपटानंतर कंगना 'क्वीन', 'मणिकर्णिका', 'तनु वेड्स मनु', 'गँगस्टर', 'मेट्रो', 'वो लम्हे' अशा अनेक चित्रपटांमध्ये झळकली आहे.
