करोनाचा प्रादुर्भाव रोखण्यासाठी अनेक देशामध्ये लॉकडाउनची घोषणा करण्यात आली आहे. त्यामुळे लाखो लोकं घरीच आहेत. भारतामध्येही २५ मार्च ते १४ एप्रिलदरम्यान लॉकडाउनची घोषणा करण्यात आली आहे. या काळात अनेक चित्रपट आणि मालिकांचे चित्रीकरण रद्द करण्यात आले. त्यामुळे सर्व कलाकार घरात बसून आपल्या कुटुंबीयांसोबत वेळ घालवत आहेत. पण कलाकार घरात बसून देखील शॉर्टफिल्म तयार करत आहेत. नुकताच अभिनेते, दिग्दर्शक, निर्माते महेश मांजरेकरांनी देखील घरात बसून करोनावर आधारित शॉर्टफिल्म केली आहे. ही शॉर्टफिल्म प्रेक्षकांच्या चांगलीच पसंतीला उतरत असल्याचे दिसत आहे. बॉलिवूडचा दबंग खान सलमानने महेश मांजरेकरांची ही शॉर्टफिल्म सोशल मीडियावर शेअर केली आहे. ही फिल्म करोना व्हायरसवर आधारित असून तुमची एक छोटी चुक संपूर्ण कुटुंबाला कशी भोगावी लागेल हे सांगत आहे. यामध्ये कोणतेही संवाद नाहीत. पण तरीही फिल्म बरच काही सांगून जाते. फिल्मची सुरुवात ही महेश मांजरेकरांच्या मुली लॉकडाउनमुळे घरात बसून कॅरम खेळताना तर महेश हे दारु पिताना आणि धूम्रपान करताना होते. दारु आणि सिगारेट संपल्यामुळे ते आणण्यासाठी घराबाहेर पडतात. त्यांनी सध्याच्या परिस्थितीमध्ये बाहेर जाऊ नये म्हणून त्यांच्या मुली प्रयत्न करत असतात. पण ते कोणाचेही ऐकत नाहीत आणि खाली जाऊन सिगरेट-दारु घेउन येतात. पण ते परत आल्यावर मात्र त्याचा परिणाम सर्व कुटुंबीयांवर होतो. View this post on Instagram A post shared by Salman Khan (@beingsalmankhan) on Apr 8, 2020 at 5:09am PDT फिल्ममधील सईचा अभिनयन पाहून तुमच्याही डोळ्यात पाणी आल्याशिवाय राहणार नाही. सध्या सर्वांनाच या कठीण काळाचा सामना करावा लागत आहे. त्यामुळे तुमचा निष्काळजीपणा किंवा छोटीशी चूक सुद्धा खूप मोठ नुकसान करुन जाऊ शकते हे वास्तव आहे. असा संदेश या शॉर्टफिल्ममधून देण्यात आला आहे.