अभिनेत्री मिताली मयेकर आणि सिद्धार्थ चांदेकर या लोकप्रिय जोडीने नवीन वर्षात लग्नगाठ बांधली. २४ जानेवारी रोजी मोठ्या थाटामाटात या दोघांचा विवाहसोहळा संपन्न झाला. विशेष म्हणजे कलाविश्वापासून ते चाहत्यांपर्यंत या लग्नाची चर्चा झाली. त्यांच्या लग्नाचे अनेक फोटो, व्हिडीओदेखील सोशल मीडियावर व्हायरल झाले. त्यातच आता मितालीने लग्नानंतर तिच्या सोशल मीडिया अकाऊंटमध्ये एक बदल केला आहे. उत्तम अभिनय आणि निखळ हास्यामुळे अनेकांच्या मनावर राज्य करणारी मिताली कलाविश्वाप्रमाणेच सोशल मीडियावरही तितकीच सक्रीय आहे. बऱ्याचवेळा तिने सिद्धार्थ आणि कुटुंबासोबतचे काही फोटो शेअरदेखील केले आहेत. मात्र, यावेळी तिने कोणताही फोटो किंवा व्हिडीओ शेअर केला नसून तिच्या सोशल मीडिया अकाऊंटमध्येच एक बदल केला आहे. मितालीने सोशल मीडियावरील तिच्या नावात बदल केला आहे. मिताली मयेकर ऐवजी आता तिने मिताली मयेकर-चांदेकर असं नाव केलं आहे. विशेष म्हणजे लग्न झाल्यानंतर लगेचच मितालीने तिचं नाव बदलल्यामुळे चाहत्यांच्या नजरा तिच्याकडे वळल्या आहेत. पाहा : सिद्धार्थ-मितालीच्या लग्नाचा अल्बम पाहिलात का? दरम्यान, मिताली आणि सिद्धार्थ २४ जानेवारी रोजी पुण्यातील ढेपेवाडा येथे पारंपरिक पद्धतीने लग्नगाठ बांधली. मोठ्या थाटामाटात हा विवाहसोहळा झाला असून कलाविश्वातील अनेक दिग्गजांनी या सोहळ्याला हजेरी लावली होती.
