'लॉकडाउन' 'अनलॉक' होताच सतीश समुद्रे निर्मित आगामी मराठी चित्रपट 'बबली'चा फर्स्ट लूक प्रदर्शित झाला आहे. विषयाचे वेगळेपण ही मराठी चित्रपटांची ओळख झाली आहे. अशाच एका आगळ्यावेगळ्या विषयावर आधारित हा चित्रपट आहे. 'बबली' म्हटल्यावर हिंदी चित्रपट 'बंटी और बबली'चा मनात विचार येणं साहजिकच आहे. परंतु यांच्यात नावाव्यतिरिक्त काहीही साधर्म्य नाहीये. या चित्रपटाची कथासुद्धा सतीश समुद्रे यांनीच लिहिली आहे. तर रॉबर्ट मेघा यांनी दिग्दर्शनाची धुरा सांभाळली आहे. ‘तू काही बी म्हण बबले पण दादा नको म्हणू’ अशी या चित्रपटाची टॅगलाइन आहे. या चित्रपटातील गाणी प्रकाश प्रभाकर यांनी संगीतबद्ध केली असून स्वप्नील बांदोडकर, मोहम्मद इरफान आणि वैशाली माडे यांनी ती गायली आहेत. यात भावनिक कथेला मनोरंजनाची फोडणी देण्यात आली आहे. यामध्ये कोणते कलाकार भूमिका साकारणार आहेत हे अद्याप गुलदस्त्यातच आहे. हा चित्रपट लवकरच प्रेक्षकांच्या भेटीला येईल.
