रुपेरी पडद्यावर दिवंगत शिवसेनाप्रमुख बाळासाहेब ठाकरे यांची भूमिका साकारल्यानंतर अभिनेता नवाजुद्दीन सिद्दीकी आता आगामी चित्रपटाच्या तयारीला लागला आहे. विशेष म्हणजे या आगामी चित्रपटातून त्याच्या कुटुंबातील एक व्यक्ती बॉलिवूडमध्ये पदार्पण करत आहे. नवाजुद्दीनचा भाऊ शमास नवाब सिद्दीकी या चित्रपटातून दिग्दर्शन क्षेत्रात पदार्पण करत आहे. 'बोले चुडियाँ' असं या चित्रपटाचं नाव असून हा एक रोमॅण्टिक ड्रामा असणार आहे. नवाजुद्दीन यामध्ये प्रियकराची भूमिका साकारणार आहे. वुडपिकर मुव्हिजचे राजेश भाटिया आणि किरण भाटिया या चित्रपटाची निर्मिती करत आहेत. वाचा : परीक्षेचा ताण दूर करू पाहणारा चित्रपट ‘१० वी’ शमासने याआधी काही लघुपटांचं दिग्दर्शन केलं आहे. 'हा रोमँटिक ड्रामा मी जगलो असून त्यावर खूप मेहनत घेतली आहे. त्यातच नवाजभाई भूमिका साकारणार असल्याने ही माझ्यासाठी अत्यंत आनंदाची गोष्ट आहे. प्रियकराच्या भूमिकेला ते न्याय देतील असा मला पूर्ण विश्वास आहे,' असं शमास म्हणाला. या रोमँटिक ड्रामामध्ये नवाजुद्दीनच्या प्रेयसीच्या भूमिकेत कोणती अभिनेत्री झळकणार हे पाहणं औत्सुकतेचं ठरणार आहे. मे महिन्यात या चित्रपटाच्या शूटिंगला सुरुवात होणार आहे.
