मराठी कलाविश्वात रोज नवनवीन बदल घडताना दिसून येत आहेत. उत्तम कथानक आणि नव्या धाटणीचे चित्रपट सध्याच्या काळात प्रेक्षकांच्या भेटीला येत आहेत.त्यामुळे आता बॉलिवूड चित्रपटांप्रमाणेच मराठी चित्रपटदेखील आंतरराष्ट्रीय चित्रपट महोत्सव गाजवू लागले आहेत. यामध्येच आता पुन्हा एक नव्या विषयावर भाष्य करणारा 'विस्टल ब्लोईंग सूट' हा चित्रपट प्रेक्षकांच्या भेटीला येणार आहे. ज्ञानेश्वर मर्गज दिग्दर्शित या चित्रपटातून एका मुलीच्या विविध भावभावनांच्या आविष्कारांचा एक विस्तीर्ण पट उलगडण्यात येणार आहे. विशेष म्हणजे या चित्रपटासाठी संपूर्ण टीमने प्रचंड मेहनत घेतली आहे. चित्रपटातील प्रत्येक सीन खरा वाटावा यासाठी अनेक रिअॅलिस्टिक लोकेशन्स घेण्यात आले आहेत. त्यामुळे हा चित्रपट तयार करण्यासाठी जवळपास ५ वर्षांचा कालावधी लागला आहे. नुकतीच या चित्रपटाची पहिली झलक प्रेक्षकांसमोर सादर झाली आहे. दरम्यान, आई श्री भगवतीदेवी प्रोडक्शन निर्मित या चित्रपटात अभिनेत्री विशाखा कशाळकर मुख्य भूमिकेत झळकणार आहे. विशाखाने यापूर्वी ‘नोंकझोक’ या हिंदी मालिकेत बालकलाकार म्हणून काम केलं आहे.
