बॉलिवूड चित्रपट निर्माते राम गोपाल वर्मा हे सतत कोणत्या ना कोणत्या कारणामुळे चर्चेत असतात. कधी ते त्यांच्या सोशल मीडिया पोस्टमुळे चर्चेत असतात तर कधी त्यांच्या चित्रपटांमुळे. आता राम गोपाल वर्मा यांनी असे काही केले आहे की दाक्षिणात्य सुपरस्टार पवन कल्याणच्या चाहत्यांनी त्यांच्या ऑफिसवर दगडफेक केली आहे. राम गोपाल वर्मा यांनी हैद्राबादमधील ज्युबली हिल्स पोलिसांकडे याबाबत तक्रार केली आहे. त्यानंतर तपास करून पोलिसांनी सहा जणांना अटक केली.

हा वाद राम गोपाल वर्मा यांचा चित्रपट ‘पॉवर स्टार’नंतर सुरु झाला आहे. या चित्रपटात अभिनेता पवन कल्याणचे आयुष्य चुकीच्या पद्धतीने दाखवल्याचा आरोप चाहत्यांनी राम गोपाल वर्मा यांच्यावर केला आहे. चित्रपट पाहिल्यावर चाहत्यांमध्ये संतापाची लाट उसळी. त्यानंतर त्यांनी राम गोपाल वर्मा यांच्या ऑफिसवर दगडफेक केली.

या संदर्भात राम गोपाल वर्मा यांनी ट्विट केले आहे. मला गेल्या काही दिवसांपासून अनेक धमक्या येत आहेत. पण, मी या धमक्यांना घाबरत नाही. माझ्या स्टार पॉवर या चित्रपटाला आणखी पब्लिसिटी दिल्याबद्दल त्यांचे आभार मानावेसे वाटतात असे ते म्हणाले आहेत.