बॉलिवूडप्रमाणेच सध्याच्या काळात गुजराती चित्रपटांची देखील क्रेझ वाढत आहे. त्यातच आता कमल पटेल आणि सचिन देसाई यांचा आगामी सुर्यांश हा चित्रपट लवकरच प्रेक्षकांच्या भेटीला येणार आहे. फ्रेडी दारुवाला आणि हिना आचारा यांची प्रमुख भूमिका असलेल्या या चित्रपटामध्ये अभिनेता प्रतिक परमारदेखील झळकणार आहे. ५ ऑक्टोबर रोजी प्रदर्शित होणाऱ्या या चित्रपटामध्ये प्रतिक एका धाडसी पोलीस अधिकाऱ्याच्या भूमिकेत दिसून येणार आहे. प्रतिक स्वत: एक मार्शल आर्ट डायरेक्टर असून या चित्रपटातील अनेक अॅक्शन सीन त्याने दिग्दर्शित केले आहेत. सुर्यांश हा एक आगळावेगळा चित्रपट असून यापूर्वी या गुजराती चित्रपटसृष्टीमध्ये अशा चित्रपटाची निर्मिती झालेली नाही. मी मार्शल आर्टचे धडे गिरविल्यामुळे मला स्टंट करताना कोणतीही अडचण आली नाही, असं प्रतिक म्हणाला.