करोना विषाणूचे संक्रमण दिवसेंदिवस वाढतच चालले आहे. या प्राणघातक विषाणूच्या संसर्गामुळे संपूर्ण जगात आतापर्यंत एक लाखांपेक्षा अधिक लोकांचा मृत्यू झाला आहे. अशा प्रतिकूल परिस्थितीत मदतीसाठी अभिनेत्री प्रियांका चोप्रा पुढे सरसावली आहे. तिने करोना योद्ध्यांच्या मदतीसाठी तब्बल २० हजार पादत्राणं देण्याची घोषणा केली आहे.

प्रियांकाने एका इन्स्टाग्राम पोस्टच्या माध्यमातून ही माहिती दिली. २० हजार पैकी १० हजार बूट ती लॉस एंजेलिस येथील वैद्यकिय कर्मचाऱ्यांना वाटणार आहे. तर उर्वरीत १० हजार भारतातील सरकारी रुग्णालयांमध्ये काम करणाऱ्या कर्मचाऱ्यांना देणार आहे. याशिवाय जगभरातील महिला वैद्यकिय कर्मचाऱ्यांसाठी तिने ७६ लाख रुपयांचा निधी जाहीर केला आहे.

या मदतीबाबत प्रियांका म्हणाली, “सध्या संपूर्ण जगावर करोना विषाणूचे संकट फिरत आहे. अशा संकटात डॉक्टर्स, वैद्यकिय कर्मचारी आणि पोलीस आपला जीव मुठीत धरुन काम करत आहेत. तेच खरे सुपरहिरो आहेत. त्यांच्या मदतीसाठी आपणं देखील खारीचा वाटा उचलूया.” प्रियांकाने केलेली ही पोस्ट सध्या सोशल मीडियावर सर्वांचेच लक्ष वेधून घेत आहे. अनेकांनी या मदतीसाठी तिचे कौतुक देखील केले आहे.