सध्या छोट्या पडद्यावरील वादग्रस्त पण तितकाच लोकप्रिय शो बिग बॉसचे १४वे पर्व चर्चेत आहे. बिग बॉसच्या घरात भांडणे, प्रेम, फ्रेंडशीप हे सर्व पाहायला मिळत आहेत. दरम्यान आज दाखवण्यात येणाऱ्या नॉमिनेश प्रक्रियेमध्ये राहुल वैद्यने घराणेशाही हा मुद्दा उचलला आहे आणि त्यावरुन घरातील स्पर्धकांमध्ये जोरदार भांडण सुरु झाल्याचे दिसत आहे.

आज बिग बॉसच्या घरात नॉमिनेची प्रक्रिया सुरु होणार आहे. दरम्यान राहुल वैद्य कुमार सानू यांचा मुलगा जान सानूला नॉमिनेट करताना घराणेशाही हा मुद्दा उचलताना दिसतो. ‘मी जानला नॉमिनेट करु इच्छितो. कारण मला घराणेशाहीचा प्रचंड राग येतो. बिग बॉसच्या घरात जितके स्पर्धक सहभागी झाले आहेत त्यांनी स्वत: मेहनत करुन घरात एण्ट्री मिळवली आहे. पण जानला घरात त्याच्या वडिलांमुळे एण्ट्री मिळाली आहे. त्याची स्वत:ची अशी ओळख नाही’ असे राहुल बोलताना दिसत आहे.

नुकताच कलर्स टीव्हीने त्यांच्या अधिकृत ट्विटर अकाऊंटवर बिग बॉस १४मधील आजच्या एपिसोडचा प्रोमो शेअर केला आहे. व्हिडीओमध्ये जान देखील राहुलला उत्तर देताना दिसत आहे. ‘माझे वडिल कुमार सानू आहेत. प्रत्येकजण माझ्याइतका नशीबवान नसतो. खासकरुन तूही नाही. माझ्या वडिलांविषयी काही बोलू नकोस’ असे चिडून जान बोलताना दिसत आहे.

राहुलच्या या वक्तव्यमुळे घरात अनेकांनी नाराजी व्यक्त केली आहे. सोशल मीडियावर राहुलच्या जोरदार चर्चा सुरु आहेत. काही जण राहुलला पाठिंबा देत आहेत तर काहींनी त्यावर टीका केली आहे.