काही दिवसांपूर्वी अभिनेता संजय दत्तने सोशल मीडिया पोस्टद्वारे कामातून ब्रेक घेत असल्याचे सांगितले. पण संजय दत्तने हा निर्णय का घेतला असा प्रश्न अनेकांना पडला होता. दरम्यान संजय दत्ताला चौथ्या स्टेजचा फुफ्फुसाचा कर्करोग झाल्याचे समोर आले. त्यामुळे कलाविश्वातील सर्वांनाच हादरा बसला. तसेच चाहत्यांपासून ते कलाकारांपर्यंत सर्वचजण संजय दत्त लवकरात लवकर बरा व्हावा यासाठी प्रार्थना करत आहेत. संजय दत्त लवकरच उपचरासाठी अमेरिकेला जाणार असल्याचे म्हटले जात आहे. त्यापूर्वी संजय दत्त एक काम करणार आहे. पीटीआयने दिलेल्या वृत्तानुसार संजय दत्त उपचारासाठी अमेरिकेला रवाना होण्यापूर्वी 'सडक २' चित्रपटाचे डबिंग पूर्ण करणार आहे. 'ब्रेक घेण्यापूर्वी संजय दत्त चित्रपटाच्या डबिंगचे काम पूर्ण करणार आहे. त्याचे थोडे काम बाकी आहे आणि त्याला ते पूर्ण करण्याची इच्छा आहे' असे म्हटले आहे. ८ ऑगस्ट रोजी संजयला श्वास घेण्यास त्रास होत होता. त्यानंतर त्याला लीलावती रुग्णालयात दाखल करण्यात आले होते. त्यावेळी त्याची करोना चाचणी देखील करण्यात आली. त्याचे रिपोर्ट निगेटिव्ह आल्याचे डॉक्टरांनी सांगितले. त्यानंतर संजय दत्तला चौथ्या स्टेजचा फुफ्फुसाचा कर्करोग झाल्याचे कळाले. आता तो उपचारासाठी परदेशात जाणार असल्याचे म्हटले जात आहे. संजय दत्तला कर्करोग झाल्याचे कळताच अभिनेता रणबीर कपूर आणि अभिनेत्री आलिया भट्टने त्याची भेट घेतली. तसेच अनेक कलाकारांनी सोशल मीडिया पोस्टद्वारे संजय दत्त लवकरात लवकर बरा होण्यासाठी प्रार्थना केली आहे.
