२०१८ साली प्रदर्शित झालेला ‘झिरो’ हा चित्रपट साऱ्यांच्याच लक्षात असेल. या चित्रपटात अभिनेता शाहरुख खानने मुख्य भूमिका साकारली होती. या चित्रपटानंतर शाहरुख फारसा कोणत्या चित्रपटात झळकला नाही. मात्र, लवकरच तो 'पठाण', 'सनकी' आणि अन्य एका चित्रपटात झळकणार आहे. यापैकी सनकी या चित्रपटाचं येत्या काळात चित्रीकरण सुरु होणार असल्याचं 'पिंकव्हिला'च्या वृत्तात नमूद करण्यात आलं आहे. दाक्षिणात्य दिग्दर्शक एटली कुमार यांच्या आगामी चित्रपटात शाहरुख झळकणार आहे. अद्याप या चित्रपटाचं नाव अधिकृतरित्या जाहीर झालं नसून या चित्रपटाचं नाव या सनकी असल्याचं सांगण्यात येत आहे. या चित्रपटाच्या निमित्ताने एटली कुमार पहिल्यांदाच बॉलिवूड चित्रपटासाठी काम करणार आहेत. दरम्यान, ’सनकी’ या चित्रपटात शाहरुख डबल रोल साकारणार असल्याचं सांगण्यात येत आहे. ‘डुप्लिकेट’ आणि ‘डॉन’ या चित्रपटानंतर शाहरुख तिसऱ्यांदा दुहेरी भूमिकेत पाहायला मिळणार आहे. यात तो वडील आणि मुलगा अशा दोन भूमिका साकारणार आहे.
