गेल्या कित्येक महिन्यांपासून अभिनेता सोनू सूद सातत्याने अडचणीत असलेल्या गरजुंची मदत करत आहे. सोनू सूदचा मार्च महिन्यापासून सुरु झालेला मदतीचा ओघ अजूनही कायम आहे. यामध्येच आता त्याने एका रिक्षा चालकाच्या शस्त्रक्रियेचा खर्च करण्याचा निर्णय घेतला आहे. मात्र, या बदल्यात त्याने रिक्षाचालकाकडे एक खास मागणी केली आहे. एक रिक्षाचालक अपघातामध्ये जखमी झाला असून त्याच्या हाताची शस्त्रक्रिया करायची आहे. तसंच ही शस्त्रक्रिया वेळीच झाली नाही तर या रिक्षाचालकाला त्याचा हात कायमचा गमवावा लागेल. परंतु, आर्थिक परिस्थिती बिकट असल्यामुळे या रिक्षाचालकाला शस्त्रक्रियेचा खर्च करणं शक्य नाही. मात्र, या चालकाची ही अडचण सोनू सूदने दूर केली आहे. सोनूने या शस्त्रक्रियेचा खर्च करणार असल्याचं सांगितलं असून त्याबदल्यात एक छान मोबदलाही मागितला आहे. हाथ कैसे कटने देंगे भाई ? आपकी सर्जरी 12th Oct को फ़िक्स है। अपनी ऑटो में घुमा देना कभी। — sonu sood (@SonuSood) October 4, 2020 "हात कसा काय गमावू देणार? तुमची शस्त्रक्रिया १२ ऑक्टोबरला होणार आहे. त्यामुळे फक्त कधीतरी तुमच्या रिक्षातून एक फेरी द्या", असं ट्विट सोनू सूदने केलं आहे. दरम्यान, सोनू सूद सातत्याने गरजुंची मदत करत आहे. आतापर्यंत त्याने अनेकांच्या राहण्याची, व्यवसायाची सोय केली आहे. तसंच अनेक विद्यार्थ्यांना तो शैक्षणिक मदतदेखील करत आहे.