बॉलिवूड अभिनेता हृतिक रोशनची पूर्व पत्नी सुजान खान हिचे इन्स्टाग्राम अकाऊंट हॅक झाले होते. या संदर्भातील माहिती सुजानने इन्स्टाग्रामवर पोस्ट शेअर करत दिली आहे. दरम्यान तिने या पोस्टमध्ये चाहत्यांना सावध राहण्यास सांगितले असून एका चुकीमुळे अकाऊंट हॅक झाल्याचे सांगितले आहे.

‘माझे इन्स्टाग्राम अकाऊंट एका फेक इमेलद्वारे हॅक करण्यात आले आणि ते अकाऊंट इन्स्टाग्राम असल्याचे भासवत होते. ते अधिकृत नसल्याचे मला कळाले नाही आणि मी तेथे खाली असणाऱ्या बटणावर क्लिक केले. मी तुम्हाला सर्वांना सावध करण्यासाठी ही नोट लिहित आहे. कृपया कोणत्याही इमेल आयडीवर विश्वास ठेवू नका आणि क्लिक करु नका’ असे तिने म्हटले आहे.

पुढे पोस्टमध्ये सुजानने इन्स्टाग्रामचे आभारही मानले आहेत. ‘याकडे तातडीने लक्ष दिल्याबद्दल आणि माझे अकाऊंट परत मिळवून दिल्याबद्दल इन्स्टाग्रामचे खूप आभारा’ असे म्हणत तिने इन्स्टाग्रामचे आभार मानले आहेत.

सुजानच्या या पोस्टवर अनेक सेलिब्रिटींनी कमेंट केल्या आहेत. एकता कपूरने यावर कमेंट करत मी यावर क्लिक केले होते. तर स्मृती खन्नाने तिला देखील असा मेसेज आला होता असे म्हटले आहे.