हॉलिवूड गायक आणि अभिनेता डॉनी वॉलबर्गने नवीन वर्षाच्या सुरुवातीला एका हॉटेलमध्ये जेवण झाल्यानंतर तेथील वेट्रेसला २०२० डॉलर म्हणजे भारतीय चलानुसार जवळपास १ लाख ४० हजार रुपांची टिप दिली आहे. डॉनीची पत्नी जेनी हिने सोशल मीडियावर हा फोटो शेअर करत ही माहिती दिली आहे. तिने शेअर केलेल्या फोटोनुसार डॉनीचे हॉटेलमध्ये जेवणाचे ७८ डॉलर (भारतीय चलनानुसार ५६०० रुपये) इतके बिल झाले होते. डॉनीने दिलेली ही टिप सध्या सोशल मीडियावर सुरु असलेल्या २०२० टिप चॅलेंजचा हिस्सा असल्याचे म्हटले जात आहे. जेनी आणि डॉनी नवीन वर्षाचे स्वागत करत सेंट चार्ल्स येथील IHOP हॉटेलमध्ये जेवणासाठी गेले होते. दोघांचे ५६०० हजार रुपयांचे बिल झाले आणि त्यांनी तेथील वेट्रेसला १ लाख ४० हजारांची टिप दिली आहे. कपलने बिल देताना बिलावर नवीन वर्षाच्या हार्दिक शुभेच्छा असे लिहिले. त्यांनी हा फोटो त्यांच्या इन्स्टाग्राम अकाऊंटवर शेअर केला आहे. इतकी मोठी रक्कम टिप म्हणून मिळाल्यानंतर वेट्रेस डॅनिअल फ्रांजोनी आनंदी झाली आहे. तिने एका मुलाखतीमध्ये तिला मिळालेल्या या रक्कमेचा वापर मुलांच्या भविष्यासाठी करणार असल्याचे म्हटले आहे. . @DonnieWahlberg starting 2020 off like the amazing man he is. #ihop #2020tipchallenge pic.twitter.com/AjAEN0hqL6 — Jenny McC-Wahlberg (@JennyMcCarthy) January 1, 2020 काय आहे २०२० टिप चॅलेंज? 'सीएनएन'ने दिलेल्या वृत्तानुसार हा सोशल मीडियावर ट्रेंड होत असलेल्या २०२० टिप चॅलेंजचा भाग असल्याचे म्हटले जात आहे. या चॅलेंजमध्ये जेवण वाढणाऱ्या व्यक्तीला नवीन वर्षाच्या आकड्याची टिप देण्यात येते. २०१८ मध्ये या चॅलेंजचे प्रचंड क्रेझ पाहायला मिळाले होते.